Жәаф шықәса раԥхьа Урыстәылатәи Афедерациа ҳтәыла аганахь ала аҵак ду змаз аӡбра аднакылеит. Нанҳәа 26, 2008 шықәсазы Урыстәылатәи Афедерациа ахада Дмитри Медведев инапы аҵеиҩит Аԥсны Аҳәынҭқарра исуверентәу, ихьыԥшым ҳәынҭқарроуп ҳәа изшьоз Аусԥҟа.

Нанҳәа 26, 2008 шықәса ҳҳәынҭқарра ашьақәырӷәӷәара, егьырҭ адунеи атәылақәа рганахь ала азхаҵара амҩа, аҿиара иашьагәыҭхеит. Урыстәылатәи Афедерациа ахаганахь ала Аԥсны Аҳәынҭқарреи Аахыҵ Уаԥстәылатәи Ареспубликеи исуверентәу, ихьыԥшым ҳәынҭқаррақәоуп ҳәа разхаҵара жәларбжьаратәи азхаҵара змоу ажәларқәа рхалахатәҳәаақәҵара азин анагӡареи ажәлар рыхьчареи иазырхан.

Иазгәасҭар сҭахуп Аԥсны Аҳәынҭқарра исуверентәу, ихьыԥшым ҳәынҭқарроуп ҳәа азхаҵара ашьҭахь Урыстәыла ишашьҭарақәлаз егьырҭ ЕАР-атәылақәагьы. Иахьа дареи ҳареи аофициалтә ҳәынҭқаррабжьаратә еизыҟазаашьақәа ҳамоуп. Иҳадаҳкылахьоу, аус зуа аиқәшаҳаҭрақәа, аилаӡарақәа, егьырҭ аполитика-зинтә документқәа Аԥсны аполитикатәии аекономикатәии ҿиара иацхраауеит, идырӷәӷәоит ашәарҭадара, ишьақәдыргылоит аҳәынҭқаррақәа рыбжьара акультура-рҵаратәи аинформациатәи ҵакыра.

Абарҭ аамҭақәа рыҩныҵҟа аԥсны-урыстәылатә ҳәынҭқаррабжьаратә еизыҟазаашьақәа аусеицуратә еизыҟазаашьақәа рҟазшьақәа роуит еиуеиԥшым аусхкқәа рҟны: ашәарҭадаратә, асоциал-економикатә, агуманитартә уҳәа убас иҵегьы рҟны. Урыстәыла ҳацхраауеит ҳшәарҭадара аиҿкаараҿы. Ара игылоуп урыстәылатәи абыжьбатәи арратә база.

Аԥсны акәзаргьы, ҩыза-тәылак аҳасаб ала Урыстәыла адгылара анаҭоит Арратә операциа ҷыда амҩаԥгараан.

Нанҳәа 26 атәы ҳазхьаԥшуа еиҭаҳәатәуп ари амш ҳажәлари ԥхьаҟатәи ҳабиԥарақәеи рзы алахьынҵа зшьо мшны ишыҟаз.

Иԥшьоу ахақәиҭра рхы ақәырҵеит Аԥсны иреиӷьӡаз аԥацәеи аԥҳацәеи, аҳәаанырцәтәи ҳџьынџьуаа, хатәгәаԥхарала абџьар шьҭыхны иҳацеибашьуаз - Нхыҵ Кавказ, Москва, Санкт-Петербург уҳәа Урыстәыла егьырҭ арегионқәа рҟынтәи.

Нанҳәа 26, 2008 шықәса ҳажәлар рҭоурыхтә иашара иашьананы иҟазаауеит ахаангьы.