Аԥсны Адәныҟатәи аусқәа рминистрраҟны азхьаԥшра арҭеит ааигәа Қырҭтәыла иреиҳаӡоу аполитикатә напхгареи адинмаҵзуҩцәеи Қарҭ имҩаԥысуаз аныҳәатә усмҩаԥгатәқәа раан иҟарҵаз иаарту рҳәамҭақәа. Аҭынчра ариторика аформа зҽагәылаҳәаны иҳәоу «аидгылареи» «аинышәареи» рзы изаамҭанытәиу адекларациақәа адәныҟатәи анаԥшҩи адунеитә еилазаареи рзы аҭынчра аҽазышәара аҭаххара иаҩызан иахәаԥшыр рылшоит. Аха Аԥсны арҭ аԥарда зҿаршәу атезисқәа ҳажәлар иреалтәу ашәарҭарақәеи аҭоурыхтә ԥышәеи ирнырԥшны ирыдыркылоит.

Хырԥашьа змам «аидгыларазы» ақырҭуа ган иҟанаҵаз аҳәамҭақәа Аԥсны ажәлар рсуверентә гәаҳәареи ргәаанагареи ҳасаб рзымукәа иҳәан. Уимоу, урҭ еилыкка ирныԥшуеит хыԥхьаӡарала имаҷу ҳажәлар аҟазаареи ахатәҳәаақәҵареи рзы рзин азхьамԥшра. Лабҿаба итрагедиатәу ҿырԥштәуп ҳара ҳзы Аџьариа алахьынҵа, уи фактла ахатә хаҿреи аполитикатә субиектреи ацәыӡит, аполитикатә хсаала аҟынтәи азинқәа змоу автономтә ҵакырак аҳасаб ала иӡит. Ари аҩыза асценари Аԥсны Аҳәынҭқарразы зынӡаск иудукылартә иҟам.

Қарҭаа рыгәҭакқәа ҭынчмҩала, гәаартыла иҟарҵозҭгьы, ақырҭуа напхгара ргәаԥхара аарԥшразы афундаменталтә шьаҿақәа ҟарҵозаарын:

Аҭоурыхтә хара азхаҵара: ареалтә гәреибагарахь раԥхьатәи шьаҿаны иҟалароуп Аԥсни Аахыҵ Уаԥстәылеи рыжәларқәа ирҿагыланы арратә агрессиа актқәа рзы рхареи рҭакԥхықәреи официалла разхаҵара.

Адипломатиатә ҭышәныртәалара: ацивилизациатә еигәыларахь мҩас иҟоу Аԥсны Аҳәынҭқарра ахьыԥшымра азхаҵареи зинла еиҟароу адипломатиатә еизыҟазаашьақәа рышьақәыргылареи роуп.

Ашәарҭадара азиндырратә гарантиақәа: Қарҭ шықәсырацәалатәи аиҵаҟьара ааннакылароуп, Қырҭтәыла аибашьра арҿыцра шхацмыркхо азы жәларбжьаратәи ахәдықәҵарақәа рзы зинла адҵа ҟазҵо Аиқәшаҳаҭра анапы аҵанаҩроуп, уи иарбанызаалак аимакқәа ҭынчмҩала мацара рыӡбара азгәанаҭоит.

Уи аҭыԥан ишәарҭоу адуализм аабоит. «Аҭынч» ныҳәарақәеи аполитикатә ажәахәқәеи инарыдкыланы Қырҭтәыла арбџьармчқәа рырҿыцра иаҿуп, ҳаамҭа иақәшәо мраҭашәаратәи абџьар аҿырԥштәқәа аиуеит. Қырҭтәыла иааиԥмырҟьаӡакәа имҩаԥысуа арратә ҽазыҟаҵарақәа рҿы аус здыруло асценариқәа ҩашьом: Қарҭ Аԥсни Аахыҵ Уаԥстәылеи мчыла рымпыҵахалараз апланқәа ишрыхәаԥшыц ирыхәаԥшуеит, актуализациа рзыруеит.

Ишаабо ала, «амифтә хеидкылара» аконцепциа иаҵаҵәахуп хә-миллионк иҟоу аҳәынҭқарра хыԥхьаӡарала имаҷу аԥсуа жәлар ирҿагылоу, изаамҭанытәиу агрессивтә реваншисттә план.

Ақырҭуа политикатәи адинхаҵаратәи усзуҩцәа рахь ааԥхьара ҟаҳҵоит аринахысгьы иԥаршеиу ариторикеи аиллиузиақәеи мап рцәыркларц.