Урыстәылатәи Афедерациаҿ усутә ныҟәарыла иҟазаараан, Аԥсны Аҳәынҭқарра Адәныҟатәи аусқәа рминистр Олег Барцыц Урыстәылатәи Афедерациаҟны иҟоу Ареспублика Никарагуа аҷыдалкаатә Зинмчы змоу ацҳаражәҳәаҩ Альба Асусена Торрес Мехиеи иареи аиԥылара мҩаԥыргеит.

Ҩ-ганктәи астратегиатә партниорра арҵаулара иазкыз аиҿцәажәарақәа мҩаԥысит Москва иҟоу Аԥсны Аҳәынҭқарра Ацҳаражәҳәарҭаҿы.

Аиԥылара рхы аладырхәит Адәныҟатәи аусқәа рминистр ихаҭыԥуаҩ Одиссеи Бигәаа, Урыстәылатәи Афедерациаҿ аҷыдалкаатә Зинмчы змоу Аԥсны ацҳаражәҳәаҩ Алхас Кәыҵниа, Аконсултә департамент аиҳабы Лаша Аҩӡба, жәларбжьаратәи аиҿкаарақәа аус рыцуразы Адепартамент аиҳабы Сариа Џьопуа.

Олег Барцыц атәылақәа реизыҟазаашьа аҩаӡара ҳаракы агәахәара шинаҭо атәы иҳәеит.

"Ҳара даара ҳаигәырӷьоит ҳаинырра иамоу аҿиара. Ҳаимадарақәа шьаҭас ирымоуп апартниорра иашеи акрызхыҵуа ауаҩытәыҩсатә еизыҟазаашьа шьахәқәеи. Ҳаиҿцәажәара амҽхаки ахаҭабзиареи агәахәара ҳарҭоит", ҳәа иҳәеит аминистр.

Ҷыдала ҭабуп ҳәа ахиҳәааит ацҳаражәҳәаҩ Альба Асусена Торрес Мехиа Аԥсны Аҳәынҭқарра ахада Бадра Гәынба иҭоубашьҭаҵараан лыҟазааразы.

«Гәыблыла исгәаласыршәоит Манагуа 2025 шықәса, аԥхынразы, Сандинисттәи ареволиуциа ашықәсхыҵра азгәаҭараан ҳаҟазаара. Усҟан ҳара хаҭала ҳрыдыркылеит Никарагуа ахада, акоманданте Даниель Ортега Сааведра, ахада ихаҭыԥуаҩ Росарио Мурильо " ҳәа азгәеиҭеит иара.

Иара убас аминистр Никарагуа ахада аинвестициақәеи, ахәаахәҭреи, жәларбжьаратәи аусеицуреи раларҵәаразы иабжьгаҩ Лауреано Ортега аҩ-тәылак рыбжьара аизыҟазаашьақәа рыҿиареи урҭ рырӷәӷәаразы апрактикатә шьаҿақәа рынагӡареи рҿы инаигӡо ароль ду инаҵшьны иазгәеиҭеит. Олег Барцыц апрактикаҿы аусеицура қәҿиарала аҿиара шамоу азгәеиҭеит. "Ҳтәылақәа рбизнесуаа аилаӡарақәа рыбжьарҵоит, акультуратә усхк аҟны раԥхьатәи акрызҵазкуа ашьаҿақәа ҟаҵоуп. Иазгәасымҭар алшом ҳара зегьы ҳзы дшыџьашьахәхаз «Инканто» (Никарагуатәи авокал аинститут) ахапанагӡаҩ нага, аԥснытәи ахәаԥшыҩцәа рыгәқәа хызхыз, Алиса Гыцԥҳа IV Жәларбжьаратәи лмузыкатә еицлабра-лабораториа алахәыла, аԥхьахә хадақәа руак занашьахаз Катерин Веласкес», ҳәа азгәеиҭеит аминистр.

"Ҳара ҳзы акырӡа аҵанакуеит аполитикатә ҩаӡараҿ адагьы, акультура ахаҭарнакцәа рыбжьарагьы аимадарақәа ахьышьақәгыло", ҳәа ациҵеит Олег Барцыц.

Ацҳаражәҳәаҩ Альба Асусена Торрес Мехиа Манагуеи Аԥсни реизыҟазаашьақәа рыҿиара еснагь дшадгыло шьақәлырӷәӷәеит, адкылара бзиазы ҭабуп ҳәа ралҳәеит.

"Никарагуа Аԥсны асуверенитети, аиашареи, адоуҳатә малқәеи рыцеиҩызшо иашьаратә тәыланы иахәаԥшуеит. Ҳара егьырҭ ахырхарҭақәа рылагьы еиҳагьы лассы - лассы аимадарақәа рыҟазаара ҳазҿлымҳауп», ҳәа аҳәамҭа ҟалҵеит адипломат.

Иалкаау аԥшьгарак аҳасаб ала ацҳаражәҳәаҩ ажәалагала ҟалҵеит хара имгакәа «Никарагуа Амш Аԥсны» еиҿкаазарц. Аусмҩаԥгатә иаҵанакыр алшоит:

• Итрадициатәу никарагуатәи аҵкқәа дырбара;

• Никарагуатәи акаҳуеи ачыси ргьамабара;

• Атәыла аԥсабареи акультуреи ирызку афотоцәыргақәҵа.

«Асеиԥш иҟоу акультуратә цҳа ҳажәларқәа еиҳа еиӷьны реибадырра алнаршоит, ҳаиҩызара иасимволны иҟалоит", ҳәа ацылҵеит ацҳаражәҳәаҩ.

"Никарагуа аиҳабыра Аԥсны ешьаратә тәыланы, акрызҵазкуа партниорны ирыԥхьаӡоит. Ҳара, Аԥсны ахаҭарнакцәа Никарагуа имҩаԥысуа акрызҵазкуа амилаҭтә усмҩаԥгатәқәеи, аныҳәақәеи, ацеремониақәеи зегь рахь официалла ааԥхьара раҳҭоит. Шәара уа шәыҟазааргьыа ҳара ҳзы ҳаҭыр духоит, ҳакзаара арӷәӷәаразы даҽа шьаҿахоит», ҳәа аҳәамҭа ҟалҵеит ацҳаражәҳәаҩ.

Аиԥылара ахыркәшамҭаз аганқәа еиқәшаҳаҭхеит хара имгакәа акультуратә еиҭныԥсахларақәеи аекономикатә аԥшьгарақәеи налаҵаны апроект ҿыцқәа рынагӡаразы агәаанагарқәа еимырдарц.

Аиҿцәажәарақәа ишьақәдырӷәӷәеит Аҟәеи Манагуеи рыбжьара аидгыларатә еизыҟазаашьақәа ԥхьаҟагьы рырӷәӷәара ишазыхиоу.