Аԥсны адәныҟатәи аусқәа рминистр и.н., аминистр ихаҭыԥуаҩ Одиссеи Бигәаа ԥхынгәы 24 азы идикылеит Ареспублика Башкартастан уаанӡа Аԥсны Аҳәынҭқарра азинмчзмоу ахаҭарнакс иҟаз Вадим Ақаҩба иԥшәмаԥҳәыс, Валентина Царгәыш, Ареспублика Адыгеиа уаанӡа Аԥсны Аҳәынҭқарра азинмчзмоу ахаҭарнакс иҟаз Рушьни Быҭәба иԥшәмаԥҳәыс Мзиана Агәхааи.

Аиԥылара мҩаԥган Аԥсны аҳәынҭқарратә бираҟ Амш азы аныҳәатә уснагӡатәқәа рҳәаа иҭакны.

Одиссеи Бигәаа инаҵшьны иазгәеиҭеит Валери Валикәа-иԥа Гамгьиа авторс дызмоу Аҳәынҭқарратә бираҟи агерби аԥсуа ҳәынҭқарреи, ажәлар ракзаареи, ахьыԥшымреи аиашареи символны ишырзыҟоу.

«Ари абираҟ иаҵагыланы Вадим Мҭы-иԥеи Рушьни Таи-иԥеи ҳтәыла анҭыҵ хаҭарнакра азыруан» ҳәа иҳәеит иара. Иазгәеиҭеит Валери Гамгьиа, Вадим Ақаҩба, Рушьни Быҭәба иахьа рыԥсы ҭаны ишҳалагыламгьы Аԥсны адәныҟатәи аусқәа рминистрраҟны урҭ хашҭра рымам ҳәа.

Одиссеи Бигәаа Валери Гамгьиа, Вадим Ақаҩба, Рушьни Быҭәба рҭаацәарақәа иранеишьеит аусбарҭа аиубилеитә медал «Аԥсны адәныҟатәи аусқәа рминистрра 30 шықәса ахыҵуеит».

Амедал рзынашьҭхоит Валери Гамгьиа иҭаацәа.