Лаҵара 19 рзы Урыстәылатәи Афедерациаҟны иҟоу Аԥсны Аҳәынҭқарра Ацҳаражәҳәарҭаҿы имҩаԥысит Адәныҟатәи аусқәа рминистр Олег Барцыци Асоциалтә Программақәа Рыдгыларазы Амилаҭтә Фонд Анапхгара ахантәаҩы Андреи Сергееви Аахыҵ Уаԥстәыла Апарламент ахантәаҩы ихаҭыԥуаҩ Таимураз Тадтаеви реиԥылара. Аиԥылара рхы аладырхәит Адәныҟатәи аусқәа рминистр ихаҭыԥуаҩ Одиссеи Бигәааи Урыстәыла иҟоу Аԥсны Аҳәынҭқарра аҷыдалкаатә Зинмчы змоу ацҳаражәҳәаҩ Алхас Кәыҵниеи.
Олег Барцыц Андреи Сергеев аԥсны-урыстәылатәи усеицура аҿиара иазырхоу аԥшьгарақәа шықәсырацәалатәи адгылара ахьриҭо азы Адәныҟатәи аусқәа рминистрра ахьӡала ҭабуп ҳәа ахиҳәааит.
Аԥсны-Аахыҵ Уаԥстәылатәи аизыҟазаашьақәа рыҿиара аконтекст ала, Таимураз Тадтаев даниҿцәажәоз аминистр иазгәеиҭеит Аԥсны Аҳәынҭқарреи Аахыҵ Уаԥстәыла Ареспубликеи рыбжьара еиуеиԥшым аусхкқәа рҿы аусеицура арӷәӷәара аҵак ду шамоу, апарламентбжьаратә еинырра аҳәаақәа ирҭагӡаны.
Аиԥылара мҩаԥысит иԥхоу, аиҩызаратә ҟазшьа аманы.
