Аԥсны Аҳәынҭқарра адәныҟатәи аусқәа рминистр Олег Барцыци Аԥсны Аҳәынҭқарра Аконституциатә ӡбарҭа ахантәаҩы Диана Ԥлиеи, Урыстәылатәи Афедерациа аекономикатә ҿиара Аминистрра Адәныҟатәи ахәаахәҭразы Урыстәылазегьтәи академиа Жәларбжьаратәи азин акафедра апрофессор Анаит Смбатиани реиԥылара мҩаԥысит Аԥсны Аҳәынҭқарра Адәныҟатәи аусқәа Рминистрраҿы. Аиԥылара рхы аладырхәит Аԥсны адәныҟатәи аусқәа рминистрра аусзуҩцәагьы.
Диана Ԥлиеи Анаит Смбатиани Аԥсны Аҳәынҭқарра раԥхьатәи ахада Владислав Арӡынба иира 80 шықәса ахыҵра иазку II Жәларбжьаратәи аҭҵаарадырра-практикатә конференциа "Аҳәынҭқарратә мчра архитектура: ашьақәгылара, аҿиара, аԥеиԥшқәа" аусура иалацәажәеит. Аиԥылараҿы иазгәаҭан Урыстәылатәи аҵарауааи Аԥсны Аҳәынҭқарра аҭҵаарадырратә еилазаареи рыҭҵаарадырратә еихьӡарақәа аԥснытәи аҿар радыԥхьалара иазынархоу апрограмма актуалреи абеиареи.
Олег Барцыц аиԥылара иалахәыз Аԥсны иадҳәалоу азҵаарақәа рыӡбара рхы ахьаладырхәыз азы ҭабуп ҳәа реиҳәеит, иара убасгьы иазгәеиҭеит Адәныҟатәи аусқәа рминистрра аусура аиуристтә аспектқәа Аԥсны азы даара акыр шрыҵанакуа.Аиԥылара алахәылацәа аринахысгьы хра злоу, хықәкылатәи, активлатәи аусеицуразы агәыӷра шрымоу рҳәеит, насгьы аҭҵаарадырратә традициақәа ԥхьаҟагьы ишрыцҵалатәу иақәшаҳаҭхеит.
