Аахыҵ Уаԥстәыла ахада Алан Гаглоеви Аԥсны Адәныҟатәи аусқәа рминистр Олег Барцыци реиԥылара мҩаԥысит Цхинвал, жәабран 17 рзы.

Аиԥылара рхы аладырхәит аԥсуа ган аҟынтәи: Адәныҟатәи аусқәа рминистр ихаҭыԥуаҩ Одиссеи Бигәаа, Аахыҵ Уаԥстәыла иҟоу аҷыдалкаатә Зинмчы змоу Аԥсны ацҳаражәҳәаҩ Алан Елбакиев, Адәныҟатәи аусқәа рминистрра астратегиатә усеицура Адепартамент аиҳабы Џьемал Бганба. Аахыҵ Уаԥстәыла аганахь ала аиԥылара далахәын Аахыҵ Уаԥстәыла Адәныҟатәи аусқәа рминистр инапынҵақәа назыгӡо Ахсар Џьиоев.

Аԥсны Аҳәынҭқарра Адәныҟатәи аусқәа рминистр Олег Барцыц Уаԥстәыла ахада Алан Гаглоев адкылара бзиа азы ҭабуп ҳәа иеиҳәеит, Аԥсны ахада Бадра Гәынба иҟынтәи иреиӷьу азеиӷьашьарақәа ииҭеит.

Аиԥылараан аганқәа алацәажәеит Аԥсни Аахыҵ Уаԥстәылеи реизыҟазаашьақәа амшхәаԥштә актуалтә зҵаарақәа.

Аахыҵ Уаԥстәыла ахада иусԥҟала Аахыҵ Уаԥстәылеи Аԥсны Аҳәынҭқарреи рыжәларқәа реизыҟазаашьақәа рырӷәӷәараҿы илшамҭақәа рзы Аиҩызара Аорден ианашьоуп Аԥсны адәныҟатәи аусқәа рминистр Олег Барцыц.

Одиссеи Бигәааи Џьемал Бганбеи «Аахыҵ Уаԥстәыла 35-шықәса ахыҵра азгәаҭара инамаданы» амедалқәа ранаршьеит.