Жәабранмза 19, 2026 шықәса рзы Боливариантәи Ареспублика Венесуела иҟоу аҷыдалкаатә Зинмчра змоу Аԥсны ацҳаражәҳәаҩ Заур Ӷәаџьаа афорум «Женеватәи аиқәшаҳаҭра 60 шықәса ахыҵра: актуалра, азакәанра, Венесуела аҭоурыхтә позициа» аартра ихы алаирхәит.
Афорум мҩаԥысит Венесуела АдәА рминистр Иван Хиль Пинто ихантәаҩрала.
Аминистр Хиль иқәгылараан ҩаԥхьа ишьақәирӷәӷәеит Боливариантәи Ареспублика аҳәынҭқарратә суверенитети аҵакыратә акзаареи рыхьчара азҵаарақәа рҿы зҽызымԥсахуа аҭоурыхтә позициа шамоу.
Адәныҟаполитикатә усбарҭа ахада инаҵшьны иазгәеиҭеит 1966 шықәсазтәи Женеватәи аиқәшаҳаҭра иҳәаадоу азиндырратә мчы – Гаиана-Есекибо аҵакыра акәша-мыкәша аимак ҭынчмҩала аҭышәныртәаларазы алегитимтә жәларбжьаратә-зинтә мыруга заҵәык аҳасаб ала акәны ишыҟоу.
Афорум аҳәаақәа ирҭагӡаны иара убас ажәахәқәа ҟарҵеит азин аганахь ала иналукааша аекспертцәа: аҳақьым Антонио Ремиро Бротонс, Мадридтәи автономтә университет жәларбжьаратәи иаарту азин зҽаԥсазтәыз апрофессор, ЕАР Жәларбжьаратәи Аӡбарҭа адукат, иара убас жәларбжьаратәи иаарту азин апрофессор Мариа Есперанс Ориуела.
Аусмҩаԥгатә иалахәын адипломатиатә миссиақәа рхадацәеи Венесуела аккредитациа змоу ацҳаражәҳәаҩцәеи, АдәАР ахаҭарнакцәеи, иара убас амассатә информациа ахархәагақәа рхаҭарнакцәеи.
