Цәыббра 5 азы Приднестровиатәи Молдавиатәи Ареспубликаҿы азинмчнагӡа змоу Аԥсны Аҳәынҭқарра ахаҭарнак Александр Ватаман Приднестровиатәи Молдавиатәи Ареспублика ашьақәгылара 35 шықәса ахыҵра иазку жәларбжьаратәи аҭҵаарадырра-практикатә конференциа ихы алаирхәит.
Аконференциа алахәылацәа рхыԥхьаӡараҿы иҟан Приднестровиатәи Молдавиатәи Ареспублика ашьаҭаркҩцәа, уажәтәи аҳәынҭқарратә усзуҩцәа, аҵарауаа уҳәа убас иҵегьы.
Аконференциа алахәылацәа рҿаԥхьа дықәгыланы Александр Ватаман иҳәеит: "Приднестровиатәи Молдавиатәи Ареспублика даара иуадаҩыз аҭагылазаашьақәа рҿы иаԥҵан, аҿиарагьы аиуит иуадаҩыз аамҭақәа рзы. Приднестровие ауааԥсыра, 35 шықәса ирылагӡаны рџьабаала аҳәынҭқарра анаҩстәи аҿиаразы ашьаҭа бзиа аԥырҵеит".
Адипломат иазгәеиҭеит: "Приднестровиатәи Молдавиатәи Ареспубликеи Аԥсны Аҳәынҭқарреи рҭоурых акыр еиԥшуп". Аҳәынҭқарра аргылараҿы ҳреспубликақәа иаҳзеиԥшу адоуҳатә мазарақәа, аҭынчреи ахьыԥшымреи ргәазыҳәара еиднакылоит. Абас еиԥш иҟоу аҭоурыхтә ԥеиԥшқәеи ҳаамҭазтәи аҽазышәарақәеи реиԥшра Приднестровие ахь Аԥсны аинтерес аанарԥшуеит, иахьатәи аконференциа зызку ахырхарҭагьы уахь иналаҵаны”.
