Ареспублика Никарагуа иҟоу Аԥсны Аҳәынҭқарра ацҳаражәҳәаҩ Инар Ладариеи Ацҳаражәҳәарҭа аминистр-абжьгаҩ Алиас Аибеи рхы аладырхәит Ареспублика Куба амилаҭтә фырхаҵа, ашәҟәыҩҩы, атәыла ахьыԥшымра азықәԥаҩ Хосе Марти аибашьраҿы фырхаҵарыла дҭахеижьҭеи 130 шықәса аҵра иазкыз аусмҩаԥгатә ду.

Аусмҩаԥгатә, ажәларқәа рыбжьара еицырзеиԥшу апринципқәеи, асуверенитети, асоциалтә иашареи ирыбзоуроу аҭоурыхтә еицхыраареи адоуҳатә еимадареи ртәы азгәаҭаны, Никарагуа адәныҟатәи аусқәа рминистрраҿы имҩаԥысит.

Ацеремониа рхы аладырхәит Никарагуа аиҳабыра рхаҭарнакцәа, Адәныҟатәи аусқәа рминистрра аусзуҩцәа, иара убас атәылаҿы аккредитациа змоу адипломатиатә корпусқәа.

Аиԥылара алахәылацәа ражәахәқәа рҿы иазгәарҭеит Хосе Марти иидеиақәа рҵакы, аколониализм иаҿагыло ареволиуциатә усмҩаԥгатәқәа рҿы илагала, иара убасгьы игуманисттә ҭынха ҳаамҭазтәи Латинтәи Америказы иамоу аҵакы.