Шьамтәылатәи Арабтә Республикаҿы иҟоу аҷыдалкаатәи азинмчнагӡеи змоу Аԥсны Аҳәынҭқарра ацҳаражәҳәаҩ Муҳаммад Али Афонд «Шьамтәылатәи аҭаацәаратә диалог» анапхгара ахантәаҩы Ахед Шарифа дылԥылеит.

Аиԥылараан Шарифа Аԥсны Аҳәынҭқарреи ажәлари 2023 шықәсазы иҟалаз адгьылҵысра ашьҭахь Шьамтәылатәи ажәлар ирырҭаз адгылара аҳаҭырқәҵара иадырганы Афонд аҟынтәи аҳаҭыртә шәҟәы Муҳаммад Али инапаҿы илҭеит.

Муҳаммед Али ари азҿлымҳара ҭабуп ҳәа ахиҳәааит, Аԥсни Шьамтәылеи ирыбжьоу аимадара ҵаула инаҵшьны иазгәеиҭеит.

Иара убас, адипломат иазгәеиҭеит Аԥсны анапхгара Шьамтәылеи Аԥсни реизыҟазаашьақәа рырӷәӷәаразы агәазыҳәара шрымоу, аҩ-ганктәи аинтересқәа зызрымоу ахырхарҭақәа зегьы рзы.