2025 шықәса нанҳәа 12 азы Боливариантәи Ареспублика Венесуела иҟоу Аԥсны Аҳәынҭқарра ацҳаражәҳәаҩ Заур Ӷәаџьаа, Венесуела Адәныҟатәи аусқәа Рминистрра ааԥхьарала, атәыла адәныҟатәи аусқәа рминистр инапхгарала имҩаԥысыз аилатәара далахәын. Аилатәараҿы Еиду Америкатәи аштатқәа реиҳабыра Венесуела аҭагылазаашьа ашьақәҟьаразы иҟанаҵо аҽазышәара атәы иалацәажәеит.
Каракас аккредитациа змоу адипломаттә корпус ахаҭарнакцәа рԥылараан, Иван Хиль иҳәеит, Еиду аштатқәа, Аладатәи акоманда (Comando Sur) ала, аҭагылазаашьа шьақәҟьарц азы Венесуела мацара акәымкәа Латинтәи Америка зегьы иақәлар шаҭаху.
Аҳәынҭқарра ахада Николас Мадуро «иԥсы ҭаны ма иҭамкәа» иаанкылараз агәазыҟаҵара аҟаҵарала Венесуела аҭышәынтәалара аилагаразы иҟанаҵаз аҽазышәара ҿыцқәа ирыдҳәаланы, аминистр Иван Хиль адунеизегьтәи ауаажәларра ааԥхьара риҭеит Еидҵоу Амилаҭқәа Реилазаара Аԥҟаԥҵәа ӷәӷәала еилазго ари атеррористтә усмҩаԥгатә иақәыӡбарц.
Хиль иазгәеиҭеит, атәыла иазаадырԥшуа ацәымӷра ду иахьмырԥшыкәа Венесуела аизҳазыӷьареи, аекономикатә ҿиареи, зегь раасҭа ихадоу – асуверенитети ашәарҭадареи рымҩа ишықәу.
Аиԥылара рхы аладырхәит Венесуела аккредитациа змоу ацҳаражәҳәаҩцәеи адипломатиатә миссиақәа рнапхгаҩцәеи, Венесуела адәныҟатәи аусқәа Рминистрреи, аинформациатә хархәагақәеи рхаҭарнакцәеи, егьырҭ асасцәеи.
