Хәажәкыра 29 азы Триест ақалақь аҿы Аԥсны Аҳәынҭқарра Адәныҟатәи аусқәа Рминистрра иҷыдоу адҵақәа рынагӡараз ацҳаражәҳәаҩ Вито Гриттании Триест ақалақь ахада Роберто Ди Пиаццеи еиԥылеит.

Аиԥылараҿы Гиттани Аԥсны адәныҟатәи аусқәа рминистр и.н. Сергеи Шамба иҟынтәи асалами Ди Пиацца Аҟәа даҭаарц ааԥхьареи ииҭеит. Вито Гриттани агәыӷра ааирԥшит Ди Пиацца ааԥхьара идкыланы иаарласны Аԥсны еибадыррак аҳасаб ала даҭаап ҳәа.

Аԥсуа дипломат ақалақь ахадеи аиԥылара иалахәызи ирыдигалеит апроект «Адунеи аџьар». «Аџьар, - иҳәеит Гриттани, - иаарласны Триестынтәи Урыстәылаҟа ишьҭхоит, апланета зегьы азы аҭынчреи аиҩызареи рдыргак еиԥш».

Амҿтәы џьар, хәажәкыра 28 азы Триест амуниципалтә хеилак адепутат Сальваторе Порро далахәны ацқьаҭыԥ Монте Гисс аҟынтәи Аб Луиџьи иԥшьеит.

Гриттании Ди Пиаццеи реиԥылара еиҿыркааит Триест амуниципалтә бжьагаҩ Уго России OLT-Osservatorio Libero Trieste апрезидент Либеро Триест Џьорџьо Дескеи.

Уго России Џьорџьо Дескии 2025 шықәсазтәи Аԥсны Аҳәынҭқарра ахада иалхрақәа рҿы хылаԥшыҩцәак рыҳасаб ала иҟан.