Ареспублика Никарагуа иҟоу Аԥсны Ацҳаражәҳәарҭаҟны Ареспублика Никарагуеи Аԥсны Аҳәынҭқарреи рыбжьара адипломатиатә еизыҟазаашьақәа шьақәгылеижьҭеи 15 шықәса аҵра иазкыз аныҳәатә дкылара мҩаԥысит цәыббра 10, 2024 шықәсазы.
Ацеремониа иалахәын Никарагуа аиҳабыра, Никарагуа Амилаҭтә ассамблеиа адепутатцәа, Никарагуа аккредитациа змоу аҩыза-ҳәынҭқаррақәа рыцҳаражәҳәаҩцәа, абизнес-еилазаара ахаҭарнакцәа, АИХқәа рхаҭарнакцәа.
Ауснагӡатә алагамҭаз Ареспублика Никарагуеи Аԥсны Аҳәынҭқарреи рҳәынҭқарратә гимнқәа арҳәан.
Адипломатиатә дкылара аартраан ажәахә ҟарҵеит Ареспублика Никарагуа иҟоу Аԥсны азинмчнагӡеи алкааҷыдақәеи змоу ацҳаражәҳәаҩ Инар Ладариеи Ареспублика Никарагуа Адәныҟатәи аусқәа рминистр Вальдрак Џьентскеи.
Инар Ладариа Аԥсны ахада Аслан Бжьаниеи Адәныҟатәи аусқәа рминистр Сергеи Шамбеи рыхьӡала Никарагуа ахада Даниель Ортегеи, Никарагуа аиҳабыреи ажәлари асалам риҭеит.
Инар Ладариа иқәгылараҿы еизаз ирзеиҭеиҳәеит Аԥсны ажәлар рхьыԥшымреи рсуверинитети рзы рықәԥара аҭоурых, дырзааҭгылеит аԥсны-никарагуатә еизыҟазаашьақәа, далацәажәеит Ацҳаражәҳәарҭа аусура. Аԥсны ацҳаражәҳәаҩ иазгәеиҭеит ҩ-ганктәи аизыҟазаашьақәа рыҿиара алшара ду шамоу, Аԥсны анапхгара хырхарҭарацәала аусеицура ишазыхио.
Ареспублика Никарагуа Адәныҟатәи аусқәа рминистр Вальдрак Џьентск Никарагуа ахада Даниель Ортегеи, ахада ихаҭыԥуаҩ Росарио Мурильои, Никарагуа аиҳабыреи ажәлари рыхьӡала Аԥсны ахада Аслан Бжьаниеи, Адәныҟатәи аусқәа рминистр Сергеи Шамбеи, ацҳаражәҳәаҩ Инар Ладариеи Аԥсны иқәынхо ажәлари аныҳәа рыдныҳәало салам риҭеит. Аминистр иазгәеиҭеит 15 шықәса раԥхьа ҳтәылақәа аҳаҭыреиқәҵара, ажәларқәа рыбжьара аилибакаара, аусеицура шьаҭаны изауыз аиҩызарахь раԥхьатәи ашьаҿақәа шыҟарҵаз.
«Еиуеиԥшым, хыԥхьаӡара рацәала апроектқәа аус рыдуылараан ҳара цәшәарада ауадаҩрақәа ҳариааиуан, аусеицуратә ҟазшьа амны ҳхы мҩаԥаагон. Иахьатәи аныҳәа азгәаҭара ииасыз аамҭа адагьы символра азнауеит уаҵәтәи ҳамҩа – еиҳа еизааигәоу, еишьашәалоу ҳусеицура амҩа» ҳәа иҳәеит иара.
Аминистр Џьентск иара убасгьы иҳәеит: «Ҳара аоптимизми агәыӷреи ҳаманы уаҵәтәи амш ҳазыԥшуеит, агәра ганы ҳаҟоуп ҳусеицуреи наҟ-ааҟтәи ҳашәҭыкакаҷреи шеизҳазыӷьо аҭынчреи аиашареи рыхьӡала. Никарагуа ахьӡала ҳара ишьақәҳарӷәӷәоит ҳаиҩызареи ҳусеицуреи еиҳагьы ишҳарӷәӷәо, ҳажәларқәа рыбжьара аҳаҭыреиқәҵареи аимадарақәеи шеизҳарҳауа, ҳхалахатәҳәаақәҵаразы ҳақәԥара ишацаҳҵо».
Аныҳәатә дкылара ацеремониа акыр аԥхарра аҵаны имҩаԥысит. Алахәылацәа наҟ-ааҟ аинтерес ззеицрымаз азҵаарақәа инарҭбааны ирылацәажәеит, ргәаанагарақәа еимырдеит.
