Приднестровиатәи Молдавиатәи Ареспубликаҿы иҟоу Аԥсны Аҳәынҭқарра Аофициалтә Хаҭарнакраҿы имҩаԥысит Приднестровиатәи Молдавиатәи Ареспубликаҿы Аԥсны Аҳәынҭқарра аҷыдалкаатә зинмчы змоу ахаҭарнак Александр Ватамани ареспубликатә газеҭ «Приднестровие» аредактор хада Александр Карасеви русуратә еиԥылара.
Аиԥылараан, аганқәа, Аԥсны Аофициалтә Хаҭарнакреи агазеҭ «Приднестровиеи» 2025 шықәсазы реинырра аихшьаалақәа ирылацәажәеит, иагьазгәарҭеит 2026 шықәсазтәи русеицуратә планқәа, урҭ рахь иаҵаркуп Аԥсны Аҳәынҭқарраҿы имҩаԥысуа ахҭыс хадақәа ртәы еиҭазҳәо арубрика «Аиашьцәа» арҭбаара.
Александр Карасев, агазеҭ «Приднестровие» аколлектив агазеҭ «Республика Абхазиа» аколлектив иааигәаны рнырра аинтерес шазаадырԥшуа шьақәирӷәӷәеит, аредактор хадацәа рыҩаӡаралагьы аредакциатә еилазаарақәа рыҩаӡаралагьы.
Аганқәа еиқәшаҳаҭхеит ирыбжьарҵаз аиқәшаҳаҭрақәа рынагӡаразы аконструктивтә диалоги аусеицура бзиеи ԥхьаҟагьы иацырҵаларц.