2024 шықәса жьҭаара 18 рзы Боливариантәи Ареспублика Венесуела иҟоу Аԥсны Аҳәынҭқарра Ацҳаражәҳәаҩ Заур Ӷәаџьаа, Венесуела Адәныҟатәи аусқәа рминистрра ааԥхьарала, афорум «БРИКС: ахырхарҭарацәатә дунеи аргылара апроцесс аҿы» ихы алаирхәит.
Аусмҩаԥгатә Венесуела Адәныҟатәи аусқәа рминистрраҿы имҩаԥысит, уи хантәаҩыс даман Адәныҟатәи аусқәа рминистр Иван Хиль Пинто. Уи рхы аладырхәит Венесуела аккредитациа змоу ацҳаражәҳәаҩцәеи адипломатиатә миссиақәа рнаԥхгаҩцәеи, Венесуела Адәныҟатәи аусқәа рминистрра ахаҭарнакцәеи, аинформациатә хархәагақәа, рлахәылацәеи, егьырҭ асасцәеи.
Венесуела иҟоу Урыстәыла ацҳаражәҳәаҩ Сергеи Мелик-Багдасаров иажәахә аҿы, ҷыдала, жьҭаарамза 22 инаркны 24 рҟынӡа Урыстәыла имҩаԥысраны иҟоу XVI БРИКС асаммит аҵакы ду шамоу азгәеиҭеит. Уи иазгәеиҭеит асаммит абзоурала атәылақәа реимадара арҭбаара алыршахоит ҳәа.
Бразилиа ацҳаражәҳәаҩ Жилвана Мариа де Оливеира иазгәалҭеит лтәыла Венесуела аганахь ала тәылақәак иаларгало асанкциақәа ишырҿагылоу. «Ҳара мчылатәи арҭ аусмҩаԥгатәқәа рзакәантәра ҳақәшаҳаҭӡам», — ҳәа еиҭалҳәеит де Оливеира.
Венесуела Адәныҟатәи аусқәа рминистр Иван Хиль, Казань имҩаԥысраны иҟоу асаммит аҿы Венесуела БРИКС ала адунеизегьтәи аиҿкаара ҿыц аргылара иазырхоу азҵаарақәа рыҽрылархәра ишазыхиоу шьақәирӷәӷәеит.
Уи адагьы, Венесуела Адәныҟатәи аусқәа рминистрра ахада Мраҭашәаратәи атәылақәа имҩаԥырго ақәыӷәӷәаратә политика мап ацәикит, насгьы уи зызку аҿиара иаҿу атәылақәа економикала риааира аҽазышәароуп ҳәа азгәеиҭеит.
