Венесуела адәныҟатәи аусқәа рминистрра ааԥхьарала, 2025 шықәса нанҳәа 12 азы Заур Ӷәаџьаа Венесуелеи Ирани адипломатиатә еизыҟазаашьақәа рыбжьаҵара 75 шықәса ахыҵра иазкыз аусмҩаԥгатә ихы алаирхәит. Аусмҩаԥгатә напхгара аиҭоит Венесуела адәныҟатәи аусқәа рминистр Иван Хиль Пинто.
Венесуела иҟоу Аџьамтә культура Аинститут ахор аҩ-тәылак рҳәынҭқарратә хьыӡрашәақәа нанагӡеит, итрадициатәу аџьамтәии венесуелатәии амузыка адырҳәеит. Еизаз афотоцәыргақәҵа дырбан. Ауснагӡатә ахыркәшамҭаз аҩ-ҳәынҭқаррак рчысқәа ргьамабара мҩаԥысит.
Ацеремониа рхы аладырхәит Венесуела иреиҳау аҵарадырра аминистр Рикардо Санчес, адәныҟатәи ахәаахәҭра аминистр Коромото Годои, Аомбудсмен Альфредо Руис, Азиатәи аусқәа рминистр ихаҭыԥуаҩ Татиана Пиу, Европеи Аҩадатәи Америкеи русқәа рминистр ихаҭыԥуаҩ Андреа Корао, ахырхарҭарацәатәусқәа рзы аминистр ихаҭыԥуаҩ Рубен Молина, иара убас атәылаҿы аккредитациа змоу адипломатиатә корпус ахаҭарнакцәа, Венесуела иҟоу Иран Ацҳаражәҳәарҭа ахаҭарнакцәа, Венесуела адәныҟатәи аусқәа Рминистрра аусзуҩцәа.