Хәажәкыра 14 азы Венесуела иҟоу Аԥсны Аҳәынҭқарра аҷыдалкаатә зинмчы змоу ацҳаражәҳәаҩ Заур Ӷәаџьаа, Венесуела иҟоу Азинмчы ҷыда змоу Урыстәылатәи Афедерациа ацҳаражәҳәаҩ Сергеи Мелик-Багдасаров инаԥхьарала Урыстәылеи Венесуелеи рыбжьара адипломатиатә еизыҟазаашьақәа рышьақәгылара 80 шықәса ахыҵра иазкыз аусмҩаԥгатә ихы алаирхәит.

Ацеремониа Каракас ақалақь аҿы иҟоу Амилаҭтә Пантеон аҿы имҩаԥысит.

Ацеремониа напхгара азыруан Венесуела ахада ихаҭыԥуаҩ Делси Родригес, адәныҟатәи аусқәа рминистр Иван Хиль, Венесуела иҟоу Урыстәыла ацҳаражәҳәаҩ Сергеи Мелик-Багдасаров.

Ацеремониа рхы аладырхәит Венесуела анапхгара, аминистррақәеи аусбарҭақәеи рхаҭарнакцәа, иара убас Венесуела аккредитациа змоу адипломатиатә корпус алахәылацәа.

Ацеремониа аҳәаақәа ирҭагӡаны, Аԥсны ацҳаражәҳәаҩ Заур Ӷәаџьаа Урыстәылатәи Афедерациа ацҳаражәҳәаҩ Сергеи Мелик-Багдасарови, Венесуела ахада ихаҭыԥуаҩ Дельси Родригеси, адәныҟатәи аусқәа рминистр Иван Хильи аҩ-ҳәынҭқаррак ирзеиԥшу ари акыр зҵазкуа арыцхә рыдиныҳәалеит.

Иара убас, хәажәкыра 14 азы, Урыстәылеи Венесуелеи рыбжьара адипломатиатә еизыҟазаашьақәа рышьақәгылара 80 шықәса ахыҵра азгәаҭара аҳәаақәа ирҭагӡаны, Венесуела Адәныҟатәи аусқәа Рминистрраҿы акультуратә хәылԥаз ду мҩаԥган.

Асасцәа рыдыркылеит адәныҟатәи аусқәа рминистр Иван Хильи Венесуела иҟоу Урыстәыла ацҳаражәҳәаҩ Сергеи Мелик-Багдасарови. Аусмҩаԥгатә рхы аладырхәит аиҳабыра алахәылацәа, арратә напхгара, аминистррақәеи аусбарҭақәеи рхаҭарнакцәа, Венесуела аккредитациа змоу адипломатиатә корпус, ауаажәларратә усзуҩцәа. Анаҩс иқәгылеит Симон Боливар ихьӡ зху аоркестр, Урыстәылеи Венесуелеи русеицура ихадоу аамҭахәҭақәа ирызку ацәыргақәҵа аадыртит.