Ԥхынҷкәынмза 16, 2025 шықәса рзы Боливариантәи Ареспублика Венесуела иҟоу Аԥсны Аҳәынҭқарра аҷыдалкаатә зинмчы змоу ацҳаражәҳәаҩ Заур Ӷәаџьаа, Венесуела адәныҟатәи аусқәа Рминистрра ааԥхьарала Боливариантәи Ареспублика Венесуела Адәныҟатәи аусқәа рминистр Иван Хиль имҩаԥигаз ашықәс ҿыц аламҭалазтәи аныҳәатә еиԥылара ихы алаирхәит.

Аусмҩаԥгатә мҩаԥысит Каракас, Венесуела адәныҟатәи аусқәа Рминистрра аҭоурыхтә хыбра – «Каса Амариа» аҿы.

Венесуела Адәныҟатәи аусқәа рминистр Иван Хиль Адипломатиатә корпус аҿаԥхьа дықәгыло инаҵшьны иазгәеиҭеит Венесуела аиҳабыра аҭынчра аҟазаара рыҽшазыршәо. Иара иҳәеит арҭ ажәақәа баша политикатә лозунгқәан ишыҟам, урҭ ауаатәыҩса рыҿиара афундаменталтә ҵакы шрымоу.

Иван Хиль иазгәеиҭеит Боливариантәи аиҳабыра ауаатәыҩса рыҿиара шьаҭас измоу адунеи иаша аидеиа ԥхьаҟа ишырго. Иара иажәақәа рыла, аҭынчра аҽазышәара — «адақәа ирҭаныҟәо» шьоуп, мазароуп, беиароуп, иарбанызаалак аполитикатә лозунгқәеи агеополитикатә гәҭакқәеи раасҭа ихадоуп. Иара агәҽанҵара ҟаиҵеит иахьа адунеи ашәарҭара ишҭагылоу, егьырҭ ажәларқәа дара ишырҭаху аиԥш инхаларц ирықәымчуа џьоукы-џьоукы рхымҩаԥгашьа иахҟьаны.

Аминистр иара убасгьы далацәажәеит Урыстәыла, Аԥсны, Беларусь реиԥш иҟоу атәылақәа рыжәларқәа рфырхаҵаратә ҭоурых атәы: 1941 шықәсазы рыжәҩахыр еибыҭаны игыланы, руаажәлар рхақәиҭреи аҭынч ԥсҭазаареи рзы еибашьуан. Асуверенитет азы ақәԥара иазку ари азеиԥш ҭоурыхтә гәалашәара иахьа ҳтәылақәа еиднакылоит иҳәеит иара.

Аиԥылара ахыркәшамҭаз Иван Хиль Боливариантәи Ареспублика Венесуела ахада Николас Мадурои ахада ихаҭыԥуаҩ Делси Родригеси рыхьӡала адунеи ажәларқәа зегь рахь аидгылараз ааԥхьара ҟаиҵеит, агәыӷра ааирԥшит ҳазҭало 2026 шықәса аҭынчреи, аусеицуреи, арҿиареи ирышықәсны иҟалап ҳәа.