2024 шықәса ԥхынҷкәын 11 рзы Боливариантәи Ареспублика Венесуела иҟоу Аԥсны Аҳәынҭқарра ацҳаражәҳәаҩ Заур Ӷәаџьаа, Венесуела адәныҟатәи аусқәа Рминистрра ааԥхьарала, Аиакучо амҵан аибашьра 200 шықәса ахыҵра иазкыз ацеремониа ихы алаирхәит.
Аныҳәатә усмҩаԥгатә мҩаԥысит Пасео-де-Лос-Просерес ашҭаҿы, Венесуела анагӡаратә аппарати атәылаҿы аккредитациа змоу адипломатиатә корпуси алахәны.
Ацеремониа напхгара аиҭеит Венесуела ахада, акомандаҟаҵаҩ Хада Николас Мадуро Морос.
Аҳәынҭқарра ахада Мадуро иажәахә аҿы иазгәеиҭеит 200 шықәса раԥхьа ахақәиҭразы иқәԥоз ирымаз аҩыза ахықәкы змоу Венесуела ажәлар иахьатәи рықәԥарагьы актуалра аҵоуп ҳәа. Мадуро иаку, ҳаҭыр зқәу, аҵарадырра змоу, зых иақәиҭу Венесуела аргыларахь ааԥхьара ҟаиҵеит.
Аусмҩаԥгатә аҳәаақәа ирҭагӡаны, Николас Мадуро Аиакучо ақалақь аҿы гәыԥҩык аполитикатә усзуҩцәеи, арратә усзуҩцәеи, ашәҟәыҩҩцәеи, алитераторцәеи Венесуела аорден «Аиакуччо амҵан аиааира ҩышә шықәса ахыҵра» ранеишьеит.
Аусмҩаԥгатә аҿы иара убас аибашьраҿы игаз аиааира ду атәы зҳәо аматериалқәеи, "Аиакучо ахьӡи ахаҿи унаҭеит" ҳәа захьӡу аспектакли раудиоӡыргара мҩаԥган.
