Аԥсны Аҳәынҭқарра Адәныҟатәи аусқәа рминистрра адныҳәаларатә шәҟәы нанашьҭит Ареспублика Никарагуа Адәныҟатәи аусқәа рминистрра ахь адипломатиатә еизыҟазаашьақәа рышьақәыргылара 15 шықәса ахыҵра инамаданы.

Адныҳәалараҟны иазгәаҭоуп:

«Ҳажәлар рзы 2009 шықәса цәыббра 10 амш акырӡа зҵазкуа хҭысны иҟалеит. Аԥсны иқәынхо ажәлар еснагь аԥхарра ду аҵаны иргәаладыршәалоит Ареспублика Никарагуа иаднакылаз аӡбра иаша – Аԥсны Аҳәынҭқарра ахьыԥшымра азхаҵара. Ари амш ҳҳәынҭқаррақәа рыҩба рыбжьара аиҩызареи аусеицуреи рзы аизыҟазаашьақәа рырҿиара иахәдықәҵаны иҟалеит.

Аамҭа кьаҿк иалагӡаны ҳҳәынҭқаррақәа рыбжьара, апату еиқәҵареи агәрагареи шьаҭас иззышьҭоу аиҩызаратә еимадара ӷәӷәа аҿиара аиуит.

Ҳара агәахәара ҳазцәырнагоит ҳполитикатә диалог аҿиара, ҩ-ганктәи ҳаизыҟазаашьақәа реизҳара. Ҳара ҳзы акыр рыҵаркуеит арҭ аизыҟазаашьақәа.

Аԥсны иҳабжьоу аполитикатә диалоги планрацәалатәи аимадарақәеи ԥхьаҟа рырҿиара гәҭакыс иамоуп. Агәра ганы ҳаҟоуп, анаҩсгьы мчеилаҵала астратегиатә еиҩызареи ҳусеицуреи ирыцҵахап ҳәа».