Олег Барцыц, Аԥсны Аҳәынҭқарра Адәныҟатәи аусқәа рминистр имаҵураҭыԥ ахь инеиразы, Приднестровие Молдавиатәи Ареспублика Адәныҟатәи аусқәа рминистр Витали Игнатиев изааишьҭыз адныҳәалара ҭабуп ҳәа ахҳәаауа ашәҟәы изишьҭит.

Ашәҟәы атекст аҿы, ҷыдала, иазгәаҭоуп:

«Аԥсны Аҳәынҭқарреи Приднестровие Молдавиатәи Ареспубликеи акыр шықәса зхыҵуа аиашьаратә еизыҟазаашьақәеи, аҳаҭырқәҵареи, аидгылареи еидырҳәалоит. Аԥсны ауааԥсыра, 1992-1993 шықәсқәа рзтәи аибашьра аилашымҭазы раԥхьаӡа акәны аҳәынҭқаррабжьаратә еизыҟазаашьақәа зыбжьазҵаз Аԥсни Приднестровиеи реиҩызара азгәаҭо, ҷыдала аԥхарра аҵаны Приднестровие Молдавиатәи Ареспублика иазыҟоуп.

Аҩганктәи аусеицура иадҳәалоу атрадициа бзиақәа аринахысгьы Аԥсни Приднестровиеи реиҩызара арҵаулареи арӷәӷәареи рзы шьаҭа ӷәӷәаны ишыҟало агәра ганы сыҟоуп».