Аԥсны Аҳәынҭқарра адәныҟатәи аусқәа рминистр Олег Барцыц Аахыҵ Уаԥстәылатәи Ареспублика адәныҟатәи аусқәа рминистр Ахсар Џьиоеви ареспублика адәныҟатәи аусқәа рминистрра аколлективи Аџьынџьтәылатә еибашьра Дуӡӡаҿы Аиааира агара 80 шықәса ахыҵра рыдиныҳәалеит.

Адныҳәалараҿы иазгәаҭоуп:

«Аиааира Амш наунагӡа иаанхоит ҵыхәаԥҵәара змам ахаҵареи, адунеизегьтәи ауаҩытәыҩсатә доуҳатә малқәа рызиашареи, ҳәаа змам Аԥсадгьыл ахь абзиабареи ирсимволны. Аиааира ахьӡала аибашьра адәаҿи атыл аҿи иаарԥшыз ахачҳара, афырхаҵара, агәымшәара хәызмаӡам малуп, хашҭра ақәым. Аиааира згаз абиԥарақәа рфырхаҵара ԥсра-ӡра ақәым, аҭынчреи аиашареи рыхьчара иахьагьы ҳгәы азҭанаҵоит.

Аԥсни Уаԥстәылеи рыжәларқәа Аиааира Дуӡӡа агараҿы злагала дуу, зыхьӡқәа наунагӡа аҭоурых хьтәы нбанла ианызҵаз рабацәеи рабдуцәеи ирызгәдууп».