Аԥсны Аҳәынҭқарра адәныҟатәи аусқәа рминистр Олег Барцыц Боливариантәи Ареспублика Венесуела адәныҟатәи аусқәа рминистр Иван Хиль Пинто Аԥсни Венесуелеи адипломатиатә еизыҟазаашьақәа рыбжьаҵара 15 шықәса ахыҵра идиныҳәалеит.

Адныҳәалараҿы иазгәаҭоуп:

“Аамҭа кьаҿк аҩнуҵҟа ҳтәылақәа рыбжьара аиҩызаратә еизыҟазаашьа ӷәӷәақәа шьақәгылеит, урҭ шьаҭас ирымоуп аҳаҭырқәҵареи агәреибагареи.

Ҳҳәынҭқаррақәа рыбжьара адипломатиатә еизыҟазаашьақәа рышьақәгылара инаркны, иҭышәынтәалоу аинырреи аҳәынҭқаррабжьаратәи аимадарақәа рырҭбаареи мҩаԥысуеит. Аԥсны аполитикатә диалог аринахыстәи аҿиареи ҩ-ганктәи аусеицура амҽхак арҭбаареи ирызҿлымҳауп.

Агәра ганы сыҟоуп, арҭ ашықәсқәа рыҩныҵҟа аҳәынҭқаррабжьаратәи аинырра иаанарԥшуа аусеицураз иҟоу алшара бзиа инақәыршәаны, ҳстратегиатә еиҩызара еиҳагьы арҵаулареи, ҵакы ҿыцла арҭәреи шҳалшо. Уи, ҳәарада, ҳаиҩызаратә жәларқәа рыбзазара иацхраауеит”.

Олег Барцыц Венесуела ажәлар аҭынчреи аизҳазыӷьареи рзеиӷьеишьеит.