Аԥсны Аҳәынҭқарра адәныҟатәи аусқәа рминистр Олег Барцыц Аԥснытәи Аҳәынҭқарратә телерадиоеилахәыра адиректор хада Ирина Агрбеи аколлективи АТ ашьаҭаркра амш рыдиныҳәалеит.

Адныҳәалараҿы, ҷыдала, иазгәаҭан:

"1978 шықәса лаҵарамза 6 рзы Аԥсуа телехәаԥшра раԥхьаӡатәи аефир мҩаԥысит. Ари, ҳҳәынҭқарреи ҳуаажәларреи рҭоурых аҿы акырӡа зҵазкуаз, аԥсуа жәлар рзинқәа рзы рықәԥара иалҵшәаны иҟалаз хҭысхеит.

1992–1993 шықәсқәа рзтәи Аԥсны жәлар Рџьынџьтәылатә еибашьра ахлымӡахаамҭа аан ателехәаԥшра аусзуҩцәа иҳараку азанааҭдырреи агәымшәара ӷәӷәеи аадырԥшит, зегь реиҳа иуадаҩыз аҭагылазаашьақәа рҿы руалԥшьа нарыгӡон, аинформациатә блокада аԥырхуан.

Аԥсуа телехәаԥшра аҟазаара аамҭа зегьы иалагӡаны ҳтәыла аԥсҭазаара иузаҟәымҭхо хәҭакны иҟоуп, имҩаԥысуа ахҭысқәа раарԥшразы акыр зҵазкуа аус нанагӡоит.

Адәныҟатәи аусқәа рминистрраҿ ахә ҳаракны иршьоит Аминистрреи Аҳәынҭқарратә телерадиоелахәыреи (АТ) рыбжьара ишьақәгылаз аусеицура аҩаӡара, ԥхьаҟагьы Аԥсны Аҳәынҭқарра адәныҟатәи аполитика аинформациатә мҩаԥгара адгыларазы аусеицура ацҵара иазхиоуп”.

Олег Барцыц Ирина Агрбеи аколлективи ирзеиӷьеишьеит агәабзиара, инымҵәаӡо аусуратә гәацԥыҳәара, арҿиаратә еихьӡарақәа, Аԥсны Аҳәынҭқарра аизҳазыӷьаразы аихьӡара ҿыцқәа.