Аԥсны Аҳәынҭқарра адәныҟатәи аусқәа рминистр Олег Барцыц аполитикатә партиа «Амцахара» аветеранцәеи алахәылацәеи ирыдиныҳәалеит апартиа 25 шықәса ахыҵра арыцхә.

Адныҳәалараҿы иазгәаҭоуп:

««Амцахара» ашьақәгылареи аҿиареи рҭоурых – ҳҳәынҭқарра аҿиара аҭоурых ауп. Ҳаԥсадгьыл ахақәиҭреи ахьыԥшымреи хьчаны, аветеранцәа аҭынчраамҭазы Аԥсны Аҳәынҭқарра амилаҭтә интересқәа рыхьчоит. «Амцахара» ахыҵхырҭаҿы игылан ҳтәылаҿ иналукааша ауаа. Ахаангьы «Амцахара» алахәылацәа рпринцип хадақәа – аветеранцәа ракзаареи атәылаҿы аҭышәынтәалара аиқәырхареи – аԥыжәара шрырҭоз иаанхеит.
Ари, акыр зҵазкуа амш аҽны, ҳаҭыр зқәу аветеранцәеи аполитикатә партиа «Амцахара» алахәылацәеи, ҳажәлар реизҳазыӷьара иазку шәусураҿы ақәҿиара дуқәа шәзеиӷьасшьоит».