Аԥсны Адәныҟатәи аусқәа рминистр Инал Арӡынба идҵала Игор Мураҭ-иԥа Ахба Аԥсны Адәныҟатәи аусқәа рминистрра ахаҭарнак ҷыдас дҟаҵоуп евразиатәи аинтеграциа аусхк аҿы.

2021 шықәса ԥхынҷкәын 16 азы Аԥсны ахада Аслан Бжьаниа Урыстәылатәи Афедерациаҟны Аԥсны Аҳәынҭқарра азинмчра нагӡеи иҷыдоуи анапынҵақәа змаз ацҳаражәҳәаҩ Игор Ахба имаҵзураҟынтә ихы дақәиҭитәит аҽа усурак ахь ииасра инамаданы.

Ахба Игор Мураҭ-иԥа

Диит жәабран 5, 1949 шықәсазы Аҟәа, Аԥснытәи АССР.
1966 шықәсазы абжьаратә школ № 10 далгеит.
1966—1971 шш. —М. В. Ломоносов ихьӡ зху МГУ азиндырратә факультет аҿы аҵара иҵон.
1971—1976 шш. — СССР АН аҳәынҭқарреи азини ринститут аспирант.
1976—1989шш. — СССР Акультура аминистрра акоординациатә центр аҭҵаарадырратә усзуҩ.
1990—1992 шш. —СССР Иреиҳаӡоу ахеилак аппарат ареферент.
1992—2008шш. — Урыстәыла Аԥсны Аҳәынҭқарра азинмч нагӡа змоу ахаҭарнык.
2004 ш.— Аԥсны Адәныҟатәи аусқәа рминистр.
2008ш. — Урыстәылатәи Афедерациаҟны Аԥсны Аҳәынҭқарра азинмчра нагӡеи иҷыдоуи анапынҵақәа змоу ацҳаражәҳәаҩ.
Ианашьоуп аорден "Ахьӡ-Аԥша" III аҩаӡара.
2014ш. — Урыстәыла ААР агәлаҵатә дырга «За вклад в международное сотрудничество» ианашьоуп.
Дҭаацәароуп. Аԥҳа димоуп.