2024 шықәса абҵара 21 азы Аԥсны адәныҟатәи аусқәа рминистр ихаҭыԥуаҩ инапынҵақәа назыгӡо Одиссеи Бигәааи Китаи Жәлар Рреспубликаҿ иҟоу Аԥсны аҳаҭыр консул Ге Чжили еиԥылеит.
Аиԥылараҿы Одиссеи Бигәаа Китаитәи Жәлар Рреспубликеи уи ауааԥсыреи ҳаҭыр ду шрықәиҵо азгәеиҭеит, Аԥсны Таиван азҵаараҿы Пекин адгылара шанаҭои Китаи асуверенитет шазхаиҵои иҳәеит. Бигәаа ари азҵаара ҭынч мҩала иӡбахап ҳәа агәыӷра шимоу азгәеиҭеит. Иара убас, Аԥсны, астратегиатә ҩыза Урыстәылеиԥш, Китаиеиԥш ахырхарҭарацәатә дунеи иадгылоит ҳәа азгәеиҭеит.
Аԥсни Китаии рдиалог азы аԥсуа ган аартуп, иара убасгьы акультуратәи агуманитартәи еимадарақәа рырҿиареи аекономикахь аинвестициақәа ралагалара алзыршои аԥшьгарақәа гәахәарыла иаднакылоит иҳәеит Аԥсны адәныҟатәи аусқәа рминистр ихаҭыԥуаҩ инапынҵақәа назыгӡо Одиссеи Бигәаа..
Ге Чжили Аԥсни Китаии рыбжьара акультуратәи агуманитартәи усеицура аԥеиԥш дшадгыло, анаҩстәи аконсультациақәа рымҩаԥгаразы агәыӷра шимоу азгәеиҭеит.