Аԥсны Аҳәынҭқарра адәныҟатәи аусқәа рминистр Олег Барцыц аҳәынҭқарратә, аполитикатә усзуҩ, еицырдыруа аҵарауаҩ Станислав Лакоба рыцҳарала иԥсҭазаара иалҵра инамаданы адышшылара ҟаиҵеит.

Алахьеиқәҵаратә шәҟәы аҿы иануп:

«Аԥсны Аҳәынҭқарра адәныҟатәи аусқәа Рминистрра аколлектив ахьӡала, хаҭала сара сыхьӡала зыԥсҭазаара иалҵыз аҳәынҭқарратәи аполитикатәи усзуҩ, еицырдыруа аҵарауаҩ Станислав Зосим-иԥа Лакоба иҭаацәеи игәакьацәеи срыдышшылоит.

Станислав Зосим-иԥа ҳҳәынҭқарра ашьақәгылареи аҿиареи рҿы хәы змам алагала ҟазҵаз, иналукаашаз уаҩын. Иԥхьагылоу ҵарауаҩык иҳасаб ала Аԥсны аҭҵаарадырратә ԥсҭазаараҿы илагала дун. Идунеихәаԥшышьақәеи иинтересқәеи рыҭбаара, ииашара, аԥсҭазаараҿы иааирԥшуаз активтә позициа иара иганахь ала гәык-ԥсыклатәи аҳаҭырқәҵара цәырнагон.

Станислав Зосим-иԥа иԥсҭазаара иалҵра ҳтәылазы харҭәаашьа змам цәыӡуп.

Ари алахьеиқәҵараамҭазы, Станислав Зосим-иԥа Лакоба иҭаацәеи иҭынхацәеи срыдышшылоит.

Станислав Лакоба дыздыруаз зегьы ргәаҵаҿы игәалашәара наунагӡа иаанхоит».