Цәыббра 9 2008 шықәсазы Урыстәылеи Аԥсни рыбжьара официалла адипломатиатә еизыҟазаашьақәа шьақәыргылан.
Ари амш аҳәынҭқаррақәа рыҩбагьы рзы аҭоурыхтә ҵакы амоуп. Иара ажәларқәа рыҩбагьы русеицура арҿиареи арӷәӷәареи ԥхьаҟа ацҵара ирышьагәыҭны ишьоуп.
Ҩ-ганктәи аусеицура аиқәшаҳаҭра-зинтә база иаҵанакуа документқәа иреиуоуп хырхарҭарацәала аҳәынҭқаррабжьаратә еизыҟазаашьақәа иҵаҵӷәны ирзыҟоу 2008 шықәса цәыббра 17 рзы анапы зҵаҩыз аиҩызареи, аусеицуреи, аицхыраареи рзы Аиқәшаҳаҭреи ԥхьаҟатәи аусеицурақәа азыԥхьагәазҭо 2014 шықәса абҵара 24 рзы анапы зҵаҩыз аиҩызареи астратегиатә партниорреи рзы Аиқәшаҳаҭреи.
Иахьа ҳара аԥсны-урыстәылатә еизыҟазаашьақәа уаҵәтәи рԥеиԥш агәра ганы иаабартә аҭагылазаашьақәа ыҟоуп. Агәра аагоит ганрацәалатәи ҳаимадарақәа ҳтәылақәа рыжәларқәа рзы хра рыманы ишыҟоу, ринтересқәа ишрықәшәо, арегионалтә шәарҭадареи аҭышәынтәалареи хәдықәҵара шырзыруа.