Цәыббрамза 28, 2026 шықәса рзы Аԥсны Адәныҟатәи аусқәа рминистрраҿы Аԥсны Адәныҟатәи аусқәа рминистр Олег Барцыци Адомино жәларбжьаратәи Афедерациа ахада Мануель Окендои реиԥылара мҩаԥысит.
Аиԥылара иара убас рхы аладырхәит Еиду аштатқәа рҿы адомино Афедерациа ахада Маги Круз, Аԥсны адомино Афедерациа ахада Ҭеимураз Лакербаиа, АдәА рминистрра Аконсултә департамент аиҳабы Лаша Аҩӡба, Латинтәи Америкеи, Азиеи, АТР-и Рдепартамент аиҳабы Мадина Зыхәԥҳа, жәларбжьаратәи аиҿкаарақәа аус рыцуразы Адепартамент аиҳабы Сариа Џьопуаԥҳа.
Аиԥылараан аганқәа алацәажәеит 2027 шықәсазы Аԥсны Аҳәынҭқарраҟны имҩаԥыргараны иҟоу адомино азы акомандатә чемпионат азырхиареи амҩаԥгареи рызҵаарақәа.
Ҷыдала ахшыҩзышьҭра аҭан имҩаԥысраны иҟоу жәларбжьаратәи аспорттә усмҩаԥгатә аиҿкааратә аспектқәа, жәларбжьаратәи адомино Афедерациеи Аԥсны Аҳәынҭқарра адомино Афедерациеи реинырра азҵаарақәа, иара убас ачемпионат аҽазыҟаҵара аҳәаақәа ирҭагӡаны аганқәа наҟ-наҟтәи реинырра.
Олег Барцыц инаҵшьны иазгәеиҭеит аԥсуа ган ачемпионат аиҿкаареи амҩаԥгареи рҿы иахәҭоу ацхыраара аҟаҵара ишазыхиоу.
"Аԥсуа ган ас еиԥш зымҽхак ҭбаау аспорттә хҭыс Аԥсны Аҳәынҭқарраҿы имҩаԥысырц азы иахәҭоу ауснагӡатәқәа зегьы рымҩаԥгара иазхиоуп. Ҳара ҳазыхиоуп жәларбжьаратәи ачемпионат алахәылацәа рыдкылареи уи амҩаԥгаразы иахәҭоу аҭагылазаашьақәа реиқәыршәареи", ҳәа азгәеиҭеит аминистр.
Мануель Окендо иакәзар, жәларбжьаратәи аспорттә усмҩаԥгатә амҩаԥгаразы плошьадкак аҳасабала Аԥсны Аҳәынҭқарра алшарақәа шыҳараку азгәеиҭеит, апроект қәҿиарала анагӡаразы агәрагара ааирԥшит.
"Ҳара агәра ганы ҳаҟоуп Аԥсны Аҳәынҭқарраҿы адунеи ачемпионат иреиҳаӡоу аҩаӡарала ишымҩаԥгахо. Ари аҭыԥ ас еиԥш ачемпионат амҩаԥгаразы ишьахәуп. Ҳаԥхьаҟа иӡбатәуп аиҿкааратә зҵаарақәа жәпакы, уи азы аганқәа зегьы рыбжьара иааиԥмырҟьаӡакәа аинырра адгылара аҭалатәуп», ҳәа аҳәамҭа ҟаиҵеит Мануель Окендо.
Аиԥылара аихшьаалақәа рыла аганқәа 2027 шықәсазы Аԥсны адомино азы акомандатә чемпионат амҩаԥгара аҽазыҟаҵара аҳәаақәа ирҭагӡаны анаҩстәи аусеицуреи иааиԥмырҟьаӡакәа акоординациеи ишазыхиоу шьақәдырӷәӷәеит.
