Лаҵара 15 рзы имҩаԥысит лаҵара 17 рзы иазгәарҭо Аԥсны Адәныҟатәи аусқәа рминистрра аԥҵоижьҭеи 33 шықәса аҵра иазку аныҳәатә еилатәара.
Аԥсны Адәныҟатәи аусқәа рминистр Олег Барцыц иқәгылара атезисқәа
Аԥсны Адәныҟатәи аусқәа рминистрра аԥҵан 1992-1993 шш. рзтәи Аԥсны Жәлар рџьынџьтәылатә еибашьра хьанҭа аан, Аԥсны Иреиҳаӡоу Асовет аӡбарала. Адипломатиа иахьатәи ақәҿиарақәа ҳҳәынҭқарра ахыҵхырҭаҿы игылаз, асуверенитет ауасхыр шьақәзыргылоз рыхьӡқәа иузырҟәымҭхо ирыдҳәалоуп.
Урыстәылатәи Афедерациеи ҳареи ҳаизыҟазаашьақәа
Адәныҟаполитикатә усура акрызҵазкуа аспектны иҟоуп Урыстәылеи ҳареи ифундаменталтәу ҳастратегиатә еидгылара. Урыстәылатәи апартниорцәа аус рыцура аглобалтә ҟазшьа амоуп.
Кавказнҭыҵ ашәарҭадареи аҭышәынтәалареи рзы жәларбжьаратәи аиҿцәажәарақәа
Ӷәӷәала ишьақәҳарӷәӷәоит Қырҭтәыла аганахь ала арратә мчы ахархәара аиҭахацрымкра зиншьаҭала адҵа азыҟазҵо аиқәшаҳаҭра анапаҵаҩра шхымԥадатәиу.
Қырҭтәыла апозициа шьаҭас иамаӡам ареалтә ҭагылазаашьақәа, ҳаамҭазтәи астатус-кво адыррақәа. Уи шьаҭас иамоуп ииасхьоу аамҭақәа рзы афантомтә хьаақәеи аполитика зинла еиҟарам анеитралтә диалог ахырхарҭахь архынҳәраз агәазыҳәарақәеи, арратә мчы ахархәарала русқәа рыӡбараз аҭаххарақәеи.
Алатынтә Америка
Алатынтә регион – Аԥсны амшхәаԥштәгьы уахь иналаҵаны, зыпринциптә позициа ӷәӷәала ишьақәзырӷәӷәо ҳадгылаҩцәа итрадициатәла ррегион акәны иҟоуп. Арахь иаҵанакуеит Никарагуа. Иареи ҳареи ҳусеицура аҩаӡара ҳаракны имҩаԥысуеит.
Венесуелеи ҳареи ҳпартниорра акрахыҵуеит, ааигәа иҟалаз аполитикатә хҭысқәа ирыхьмырԥшыкәа, Аԥсны Аҳәынҭқарра аус ацура ԥкырада ишазыхиоу шьақәнарӷәӷәоит.
Мрагылара Ааигәа
Ҳплацдарм, ҳадгылаҩ – Шьамтәылатәи Арабтә Республикоуп. 2022 шықәсазы аполитикатә еиҭакрақәа рышьҭахь иалыршахеит наҟ-ааҟтәи аизыҟазаашьақәа реиқәырхара, Шьамтәыла аиҳабыреи ҳареи ҳаимадарақәа рырӷәӷәара.
Аахыҵ Уаԥстәылатәи Ареспублика
Ҳколлегацәеи ҳҩызцәеи ҳареи иааиԥмырҟьаӡакәа ҳаимадара узықәгәыӷша ауасхыр аԥырҵоит урҭ аимадарақәа иааиԥмырҟьаӡакәа ҵак ҿыцла ихаҭәааларц азы.
Приднестровиатәи Молдавиатәи Ареспублика
Приднестровие АдәАР адәныҟаполитикатә усура апатуқәҵара ду узцәырнагоит. Приднестровиатәи ҳҩызцәеи ҳареи еснагь ҳаимадоуп.
Африкатәи аконтинент
Ҳара иахьа аконтинент атәылақәа фба рҿы аусура мҩаԥаагоит. Ааигәа Аԥсны Аҳәынҭқарра иаҭааит Сомали аҳәынҭқарра аделегациа.
Аҳәаанырцә иҟоу аԥсуа диаспора аус рыцура
Адиаспора рполитика аԥсуа ҳәынҭқарра аполитика иақәшәозароуп.
Ҭырқәтәыла иҟоу азинмчнаӡа змоу Аԥсны Ахаҭарнакра, Шьамтәыла иҟоу Аԥсны Ацҳаражәҳәарҭа рзы иҟоуп иаку еилкаарак: Аԥсны Аҳәынҭқарра аҳәынҭқарратә политика – адиаспора ирполитикоуп. Аԥсуа-адыга диаспорақәа – ари арҭ атәылақәа рыҩныҵҟаполитикатә ԥсҭазаараҿ аҵакы змоу факторуп. Адиаспорақәеи ҳареи ҳаимадара аҳәаанырцә иҟоу ҳџьынџьуааи ҳареи иҭышәынтәалоу аинырра ҳабжьанаҵоит.
Аԥсны Аҳәынҭқарра иахьаҵанакуа ашәҟәы иҭагалоу МНПО-и Еиду Амилаҭқәа Реиҿкаара амаҵзурақәеи
Ҳара ҳзы акраҵанакуеит жәларбжьаратәи аструктурақәа русура иахьынӡауа еилаҳкаауа иҟазарц, Аԥсны атәылауаа рзы апрактикатә лҵшәа иазырхазарц. Ишьақәыргылоу апроцедурақәа реилагара, Аԥсны Аҳәынҭқарра азакәанԥҵара азхьамԥшра, мамзаргьы агуманитартә мшхәаԥштә даҽа уснагӡатәқәак рыла аԥсахраз аҽазышәарақәа зегьы аминистрра аганахь ала апринциптә ҭак аиуеит.
Аԥсны Адәныҟатәи аусқәа рминистрра адгылара аҭара
Аԥсны Адәныҟатәи аусқәа рминистрра аусура залыршахомызт атәыла анапхгаҩцәа, Аԥсны Аҳәынҭқарра ахада Бадра Гәынба, аԥыза-министр Владимир Делба, апрофильтә министррақәа рнапхгаҩцәа, Жәлар Реизара-Апарламент аиҳабы Лаша Ашәба, Апарламент адепутатцәа рыдгылара ауасхыр ӷәӷәа шьаҭас иамамызҭгьы.