Урыстәылатәи Афедерациаҟны иҟоу Аԥсны Аҳәынҭқарра Ацҳаражәҳәарҭаҿы имҩаԥысит Аԥсны Аҳәынҭқарра Адәныҟатәи аусқәа рминистр Олег Барцыци Урыстәылатәи Афедерациаҟны иҟоу Боливариантәи Ареспублика Венесуела аҷыдалкаатә Зинмчы змоу ацҳаражәҳәаҩ Хесус Рафаель Саласар Веласкеси реиԥылара.

Аиԥылара ихы алаирхәит Урыстәылатәи Афедерациаҟны иҟоу аҷыдалкаатә Зинмчы змоу Аԥсны Аҳәынҭқарра ацҳаражәҳәаҩ Алхас Кәыҵниа.

Аиԥылараан ирылацәажәан аԥсны-венесуелатәи аизыҟазаашьақәа уажәтәи рҭагылазаашьеи рыҿиара аԥеиԥшқәеи, ишьақәырӷәӷәан урҭ аринахысгьы рырӷәӷәара наҟ-ааҟтәи рҽазышәара.

Ҷыдала ахшыҩзышьҭра аҭан иара убасгьы Ааигәа Венесуела имҩаԥысуаз ахҭысқәа.

Адәныҟатәи аусқәа рминистр Олег Барцыц иҳәеит «Делси Родригес Гомес леиԥш иҟоу аԥышәа змоу аполитик, анапхгаҩы Венесуела, уи ажәлар, аҳәынҭқарратә институтқәа, аекономика ари аамҭа уадаҩ ашьҭахь аҭышәынтәалареи аизҳазыӷьареи рахь ишналго. Ҳара ҳаигәырӷьоит ажәлар Венесуела Аиҳабыра иахьрыдгылаз, Аиҳабыра рааигәара иахьыҟоу» ҳәа.

Аиԥылараан Олег Барцыц Аԥсны Аҳәынҭқарра ахада Бадра Гәынба иҟынтәи Венесуела ахада инапынҵақәа назыгӡо Делси Родригес Гомес лганахьала иреиӷьу азеиӷьашьарақәа ҟаиҵеит.

Ахәҭакахьала, ацҳаражәҳәаҩ Хесус Рафаель Саласар Веласкес иазгәеиҭеит Аԥсны иаартны Венесуела аԥхьагылаҩцәа ишрыдгыло шаанарԥшуа. Венесуела Аиҳабыреи Урыстәыла иҟоу Венесуела Ацҳаражәҳәарҭеи рыхьӡала ацҳаражәҳәаҩ Аԥсны ахада Бадра Гәынба ихьӡала гәык-ԥсыкала асалам ааишьҭит.

Аиԥылара аиҩызаратәи аконструктивтәи ҭагылазаашьа аманы имҩаԥысит.