Ԥхынҷкәын 4 рзы Аԥсны Аҳәынҭқарра адәныҟатәи аусқәа рминистр Олег Барцыц дидикылеит ҳџьынџьуаа рделегациа напхгара азызуа, Ҭырқәтәыла иҟоу аԥсуа культуратә центрқәа Рфедерациа ахада Иауз Аҭрышба.

Аиԥылара рхы аладырхәит: Ареспублика Ҭырқәтәыла иҟоу Аԥсны Аҳәынҭқарра азинмчы змоу ахаҭарнак Ибрагим Аҩӡбеи Адәныҟатәи аусқәа рминистрра Ааигәатәи Мрагылареи Африкеи Рдепартамент анапхгаҩы Артур Гагәылиеи.

Олег Барцыц Иауз Аҭрышба алхрақәа рҿы иигаз аиааира идиныҳәалеит, 1992-1993 шықәсқәа рзы Аԥсны Жәлар Рџьынџьтәылатә еибашьраан ижәлар дышрылагылаз еиԥш, ари ахьӡ ҳаракгьы ҳаҭырла ишныҟәиго азы агәрагара шимоу азгәеиҭеит.

Адәныҟатәи аусқәа рминистр Ҭырқәтәыла иҟоу Аԥсуа культуратә центрқәа Рфедерациеи Ареспублика Ҭырқәтәыла иҟоу Аԥсны Аҳәынҭқарра азинмчы змоу Ахаҭарнакреи еицымҩаԥырго аусура аҵак ду шамоу иҳәеит.

«Ҳара ари аус еснагь ҷыдала азхьаԥшра аҳҭоит, аҵыхәтәантәи аамҭазы ҳусеицурагьы акыр еиҳа игәцараҳкуеит, избанзар ҳара ҳзы акырӡа аҵанакуеит Ҭырқәтәыла иҟоу ҳашьцәеи ҳаҳәшьцәеи Аԥсны имҩаԥысуа ахҭысқәа шрыдыркыло адырра. Иахьа ҳҳәынҭқарра аҿиара адинамикатә аамҭа иҭагылоуп, ҳҳәынҭқарратә проект ҳастратегиатә ҩыза Урыстәылатәи Афедерациа ацхыраарала ишьақәҳаргылоит. Ҳара ҳзы акырӡа аҵанакуеит адунеи иқәынхо ҳашьцәеи ҳџьынџьуааи Аԥсны имҩаԥысуа ахҭысқәа рырдырра, насгьы урҭ апроцессқәа рхы рыладырхәлар акырӡа ишьахәуп ҳәа иазаҳаԥхьаӡоит», - иҳәеит Олег Барцыц.

Ҭырқәтәыла иҟоу аԥсуа культуратә центрқәа Рфедерациа ахада Иауз Аҭрышба аминистр ҭабуп ҳәа иаҳәо, алхрақәа бзианы ишымҩаԥысыз азгәеиҭеит. «Алхрақәа мҩаԥысит. Иаҵахаз ҳәагьы аӡәгьы дыҟам, избанзар иааира згаз дарбанызаалакгьы, ҳара ҳзы мҩак ауп иҟоу, ҳгәы иҭоу ҳзызхәыцуа зегь акоуп. Ҳара ҳзы Аԥсны аҳәынҭқарратә политика адиаспора ирполитикоуп», - иҳәеит иара.

Ареспублика Ҭырқәтәыла Аԥсны Аҳәынҭқарра азинмчы наӡа змоу ахаҭарнак Ибраҳим Аҩӡба Ҭырқәтәылеи егьырҭ атәылақәеи рҟынтәи ҳџьынџьуаа реимадаразы иҟоу апроектқәа дрылацәажәеит.

«Сара абра иҟоугьы, Ҭырқәтәыла иҟоугьы сџьынџьуаа ирасҳәар сҭахуп: ҳара зегьы ҳаӡәуп, ԥсадгьылк ауп иҳамоу. Ҳҳәынҭқаррагьы акы ауп, уи хәарҭа аиуразы аус ҳулароуп. Ари ҳара иаҳус хадоуп, хымԥада, ҳара зегьы еицҿакны урҭ ахықәкқәа рынагӡаразы иҳалшо ҟаҳҵалоит. Агәра ганы сыҟоуп зыӡбахә ҳалацәажәаз апрограммақәа зегь шынагӡахо» ҳәа иҳәеит Ибраҳим Аҩӡба.

Аиԥылараҿы ирылацәажәеит адәныҟатәи аусқәа Рминистрреи Ҭырқәтәыла иҟоу Аԥсуа культуратә центрқәа Рфедерациеи русеицура иадҳәалоу актуалтә зҵаарақәа, иара убас, еицырзеиԥшу агуманитартәи акультуратәи проектқәа рынагӡара алыршара.