Ԥхынгәы 7 рзы Аԥсны Адәныҟатәи аусқәа рминистрраҟны имҩаԥысит Аԥсны Адәныҟатәи аусқәа рминистр Олег Барцыци Ҭырқәтәылантәи аԥсуа диаспора ахаҭарнак, Аднан Мендерес Иуниверситет (Ҭырқәтәыла) адоцент Ельчин Аӡынбеи реиԥылара.
Аиԥылара иара убас рхы аладырхәит Аԥсны Адәныҟатәи аусқәа рминистр ихаҭыԥуаҩ Иракли Ҭыжәбеи аԥсадгьыл ахь архынҳәразы Аԥсны Аҳәынҭқарратә еилакы ахантәаҩы ихаҭыԥуаҩ Асҭамыр Багаҭелиеи.
Аиԥылараан Ельчин Аӡынба инарҭбааны еиҭалҳәеит жәларбжьаратәи аплошьадкақәа рҿы агуманитартә мшхәаԥштә аӡыргаразы имҩаԥылго лусура атәы, аԥсуа милаҭ рзинқәеи ркультуратә хаҿреи рыхьчарагьы налаҵаны.
Ахәҭакахьала аминистрра ахада Олег Барцыц Аԥсны Аҳәынҭқарра иазку аобиективтә информациа адунеитә еилазаара аҟынӡа анагаразы аҽазышәарақәа ԥсахрада рҭаххара дазааҭгылеит.
Иара убасгьы инаҵшьны иазгәеиҭеит адиаспора аҟынтәи ҳџьынџьуаа жәларбжьаратәи азинхьчаратә плошьадкақәа рҿы русура ралахәхара аҵак ду шамоу, Ельчин Аӡынба гәык-ԥсыкала иҭабуп ҳәа леиҳәеит лџьабааи, лҭоурыхтә ԥсадгьыл гәык-ԥсыкала азыҟазаареи, жәларбжьаратәи аренаҿы лыжәлар рзинқәа рыхьчаразы иааиԥмырҟьаӡакәа лусуреи рзы.
