Лаҵарамза 18 рзы Москва ақалақь ахь Аԥсны Адәныҟатәи аусқәа рминистр Олег Барцыц иусуратә ныҟәара аҳәаақәа ирҭагӡаны имҩаԥысит Урыстәыла Афедерациа Ахеилак жәларбжьаратәи аусқәа рзы Аилак рхантәаҩы Григори Карасини иареи реиԥылара.

Олег Барцыц инаҵшьны иазгәеиҭеит аҵыхәтәантәи аамҭазы аԥсуа-аурыс усеицура аимпульс цҵа шаҭоу, зымҽхак ҭбаау аинфраструктуратә проектқәа шырацәоу. Иара убасгьы иара иазгәеиҭеит Аԥсны АдәАРеи Урыстәыла АдәАРеи рыбжьара акоординациатә еинырра шыҟоу.

Григори Карасин иганахьала иазгәеиҭеит урыстәылазы асовет мчра ашьҭахьтәи аҵакыраҿы абаланси аҭынчреи реиқәырхара ахәҭаҿы Аԥсни иареи русеицура аҵак ҷыда шамоу.

Аиԥылараан ирылацәажәан аҳәынҭқаррабжьаратә аԥсуа-аурыс усеицура, аиқәшаҳаҭра-зинтә база арҿиара, апарламентбжьаратә еинырра рызҵаарақәа. Инаҵшьны иазгәаҭан еиуеиԥшым аҩаӡарақәа рҿы аинырра аҵак ду шамоу, апарламенттә ҩаӡарақәагьы уахь иналаҵаны.