Ԥхынҷкәынмза 11 рзы Аԥсны Аҳәынҭқарра адәныҟатәи аусқәа рминистр Олег Барцыц Аԥснытәи Аҳәынҭқарратә университет «Жәларбжьаратәи аизыҟазаашьақәа» афакультет астудентцәа дырԥылеит.
Аԥсны Аҳәынҭқарра адәныҟатәи аусқәа рминистр Олег Барцыц Аԥснытәи Аҳәынҭқарратә Университет аҿы Жәларбжьаратәи аизыҟазаашьақәа рзанааҭ ала астудентцәа дырԥылеит.
Адәныҟатәи аусқәа рминистр Олег Барцыц иқәгылара:
«Аԥсны Адәныҟатәи аусқәа рминистрра аҳәаанырцәгьы активла ҳтәыла адәныҟатәи аполитика мҩаԥнагоит. Ҳара, Аԥсны Аҳәынҭқарра аҳәынҭқарратә суверенитет азхазҵаз атәылақәа аус рыцаауеит, иара убасгьы адипломатиатә еизыҟазаашьақәа ҳабжьаҵар ахьалшои адәныҟатәи аимадарақәеи, агуманитартәи акультуратәи еизыҟазаашьақәа рыҿиара ахьалшои атәылақәа рсиа ҳарҭбаауеит.
Ҳәарас иаҭахузеи, ари аҩыза аус ахатә ҷыдарақәа амоуп. Уи еснагь иаартым, рацәак ҳалацәажәаӡом, еиҳаракгьы еиныррақәак ма еиԥыларақәак ҳҽырзыҟаҳҵозар.
Аха ари аусура иалҵшәахоит тәылак ма тәылақәаки ҳареи еиҳа иактиву, иҵакылатәу ҳаизыҟазаашьақәа. Ҳәарада, сара урҭ атәылақәа рыхьӡқәа сҳәом, аха урҭ рахь иаҵанакуеит Латинтәи Америка, Африкатәи аконтинент, Мрагылара Ааигәа, Алада-Мраҭашәаратәи Азиа. Убри аҟнытә исҳәар сылшоит Адәныҟатәи аусқәа рминистрра акырӡа инарҭбаау агәҭакқәа амоуп ҳәа.
Агәра ганы сыҟоуп, ҳтәыла акәша-мыкәша иҟоу аҭагылазаашьаз азҵаарақәеи аҭакқәеи ррежим ала инарҭбааны лассы ҳаицәажәап ҳәа.
Иааркьаҿны иуҳәозар, ҳара активла аус аауеит, насгьы, ари ажәа иреиӷьу аҵакала, агрессивтә ҟазшьа ааҳарԥшуеит ҳинформациатә усмҩаԥгатәқәа рҿеиԥш, ҳпартниорцәеи ҳареи ҳаизыҟазаашьақәа рҿгьы. Адинамикатә ҭагылазаашьа ауадаҩра дуи азԥхьагәаҭаратә ҩаӡара лаҟәи рыла аныԥшуеит.
Аахыҵ Кавкази Мрагыларатәи Амшын Еиқәа иаԥну арегиони рҿы аҭагылазаашьа даара аинтерес зҵоу аҿиара амоуп, ирласны зҽызыԥсахуа аҭагылазаашьақәа рыла ишьақәгылоуп. Убри аҟнытә, хымԥада, абарҭқәа зегьы ҳрызхәыцлароуп.
Ҳара, Кавказ ашәарҭадареи аҭышәынтәалареи рзы Женеватәи Жәларбжьаратәи аиҿцәажәарақәа рформатгьы уахь иналаҵаны, ҳхықәкқәеи ҳадәныҟаполитикатә мҩақәҵагақәеи напхгагас иҳамоуп. Женеватәи аформат, шәара ишәдыруазар акәхап, ҳтәыла иадҳәалоу азҵаарақәеи, ҳгәылатәи атәыла аганахь ала имҩаԥааго аусқәеи рылацәажәаразы алшара ахьҳамоу формат заҵәыкны иҟоуп, аха рыцҳарас иҟалаз, амч ахамырхәаразы анапы зҵаҩу аиқәшаҳаҭра ҳамам.
Ааигәа имҩаԥысит Женеватәи аиҿцәажәарақәа изаамҭанытәиз 65-тәи араунд. Аинтерес шәымазар, еиҳа инарҭбааны ишәзеиҭасҳәоит. Иааиуа араунд, 66-тәи, мҩаԥысуеит 2026 шықәс хәажәкырамзазы, ҳара уи уажәнатә ҳҽазыҟаҳҵоит. Ҳгәыларатәи атәыла аҵакыраҿы иҟоу аҭагылазаашьа ҳашьклаԥшуеит, ацхантәаҩцәеи урҭ хаҭарнакра ззыруа аструктурақәеи рзы адыррақәа ҳауеит. Ишыжәдыруеиԥш, урҭ рахь иаҵанакуеит ООН, ОБСЕ, ЕЕ, иара убасгьы Америкатәи Аштатқәеи Урыстәылатәи Афедерациеи рҟынтәи аделегациақәа. Нас – аинтерес зманы иҟоу х-тәылак, ҳара ҳтәылагьы уахь иналаҵаны.
Убри аҟнытә, ҳара аригьы ҳалацәажәар ҳалшоит, уи аинтерес шәзаҵазар. Шәызҵаарақәагьы, иарбан зҵааразаалакгьы, рҭак гәаартыла иҟаҳҵоит. Иҭабуп.»
Астудентцәеи иареи реицәажәараан аминистр азҵаарақәа жәпакы рҭак ҟаиҵеит, иара убасгьы сынтәа Урыстәылатәи Афедерациеи, Шьамтәылатәи Арабтә республикеи, Ҭырқәтәылатәи Ареспубликеи, Никарагуатәи Ареспубликеи рахь иҟаиҵаз аныҟәарақәа дрылацәажәеит, Женеватәи аиҿцәажәарақәа рҵаки, аҳәаанырцәтәи амиссиақәа русура атәи, аԥсуа дипломатцәа рҿаԥхьа иқәгылоу азҵаарақәа ртәи дазааҭгылеит.