Аԥсны Аҳәынҭқарра апавильон 63-тәи Жәларбжьаратәи Дамасктәи аџьармыкьа иалахәу аҳәынҭқаррақәа рхаҭарнакцәа русуратә еицәажәареи реимадара аҿиареи рзы иаартыз аплошьадкақәа ируакхеит.

Апавильон асасцәа рхыԥхьаӡараҿы иҟоуп аҳәаанырцәтәи аделегациақәа рхаҭарнакцәа дуқәа, Шьамтәылатәи Арабтә Республикаҿы иҟоу Урыстәылатәи Афедерациа Ахәаахәҭратә хаҭарнак В. Носков.

Аиԥыларақәа раан ирылацәажәоит ҩ-ганктәи аинырра азҵаарақәа, аусеицура арҭбаара аԥеиԥшқәа, иара убас агуманитартәи акультуратәи еимадарақәа ԥхьаҟатәи рыҿиара.

Иҷыдоу аҭыԥ ааннакылоит итрадициатәу аԥсуа чеиџьыка. Асасцәа ирԥылоит амилаҭтә чеиџьыкеи, амузыкеи, аԥсуа жәлар ркультура иахәҭаку асасдкылашьеи аарԥшуа.

Апавильон аҟны игоит аиҩызараиазку ажәа ҟәандақәеи Аԥсны Аҳәынҭқарреи уи ажәлари рганахь ала азеиӷьашьара бзиақәеи. Аусутә программа мҩаԥысуеит апатуеиқәҵареи, агәаартреи, гәык-ԥсыкала ауаҩытәыҩсатә еицәажәареи рҟазшьа рыманы.

Аусутә программа иналукааша хәҭаны иҟалоит арҿиаратә коллективқәа рықәгыларақәа. Аԥсуа артистцәа аиҩызаратә тәылақәа рпавильонқәа рҿы иқәгылоит, аҳәаанырцәтәи аколлективқәа ракәзар, Аԥсны Аҳәынҭқарра апавильон иасасцәахоит. Ас еиԥш иҟоу аиԥыларақәа аџьармыкьа алахәылацәеи асасцәеи еиднакылоит, акультуратә еиҭныԥсахларақәа ажәларқәа рыбжьара зыԥсы ҭоу диалогны иҟарҵоит.

Аԥсны Аҳәынҭқарра 63-тәи Жәларбжьаратәи Дамасктәи аџьармыкьа алахәхара — ари атәыла, уи акультура, атрадициақәа рцәыргара, иҟоу аимадарақәа рырӷәӷәара, аимадара ҿыцқәа рышьақәыргылара, наҟ-ааҟтәи еицыфеидоу аусеицура аринахысгьы аҿиара ишазҿлымҳау ашьақәырӷәӷәара азы илшароуп.

Аԥсны Аҳәынҭқарра аинырра аформа ҿыцқәа ирзаартуп, аиҩызаратәи апартниортәи еимадарақәа аринахысгьы рырӷәӷәара иазхиоуп.