Лаҵара 18 рзы Аԥсны адәныҟатәи аусқәа рминистр Олег Барцыц Москва ақалақь ахь иусуратә ныҟәараан Урыстәыла АдәАр иатәу МГИМО даҭааит. Аҭаара аҳәаақәа ирҭагӡаны имҩаԥысит адәныҟатәи аусқәа рминистри МГИМО аректор, академик Анатоли Торкунови реиԥылара.
Аиԥылара иара убас иалахәын Аԥсны АдәАРеи Урыстәылатәи Афедерациаҿ иҟоу Аԥсны Аҳәынҭқарра Ацҳаражәҳәарҭеи русзуҩцәа, Аҿартә политикеи, асоциалтә усуреи, жәларбжьаратәи аимадарақәеи рзы МГИМО апроректор Станислав Суровцев.
Аиԥылараан аганқәа алацәажәеит иреиҳаӡоу аҵареи аҭҵаарадырреи русхк аҟны ҩ-ганктәи аусеицура аҿиара, Аԥсны Аҳәынҭқарра адәныҟаполитикатә усбарҭазы ззанааҭдырра ҳараку акадрқәа разыҟаҵара азҵаарақәа, иара убас академиатә программақәеи астажировкақәеи рырҭбаара аԥеиԥшқәа.
Олег Барцыц инаҵшьны иазгәеиҭеит аҵаратә усхк аҟны апартниортә еизыҟазаашьақәа рырҵаулара Аԥсни Урыстәылеи рҳәынҭқаррабжьаратә усеицура ахырхарҭа хадақәа ишреиуоу.
Аминистр иазгәеиҭеит МГИМО аҭоурых беиа змоу, еиҳа илыԥшааху, динамикала иҿио аҵараиурҭақәа ишреиуоу, аректор иҭабуп ҳәа иеиҳәеит атәылазы иҟарҵо алшарақәа рзы, ҷыдала, Аԥсны Аҳәынҭқарра атәылауаа аквотақәа рзоушьҭра, Аԥсны Адәныҟатәи аусқәа рминистрра анапхгаратә еилазаара рзы аквалификациа еизырҳаратә курсқәа рахысра.
"МГИМО-ари жәларбжьаратәи аизыҟазаашьақәа рганахьала зҟазара ҳараку аспециалистцәа разыҟаҵараз иазхаҵоу центруп. Аԥсны азы ас еиԥш иҟоу ауниверситет аус ацура алшара ҿыцқәа аанартуеит ҳдипломатцәа ҿарацәа рзанааҭтә еизҳаразы", ҳәа азгәеиҭеит Олег Барцыц.
Анатоли Торкунов иҳәеит МГИМО аԥсуа ган ԥхьаҟа аус ацура ишазыхиоу, еицырзеиԥшу арҵаратә программақәеи аексперттә еиҭныԥсахларақәеи рынагӡарагьы налаҵаны.
Аиԥылара аихшьаалақәа рыла аусеицура арҭбааразы иалкаау ажәалагалақәа разырхиаразы аиқәшаҳаҭрақәа рыбжьарҵеит. Ахәҭакахьала, Аусеицуразы амеморандум анапаҵаҩразы аиқәшаҳаҭра рыбжьаҵоуп, уи аусбарҭа аусзуҩцәа рквалификациа аизырҳаразы акурсқәа рформатқәеи, иара убас МГИМО аекспертцәа Аԥсны ркурсқәеи еиҳа инарҭбаау аудиториеи аԥснытәи астудентцәеи рзы иаарту алекциақәеи рымҩаԥгара азыԥхьагәаҭара шьақәнарӷәӷәоит.
Олег Барцыци Анатоли Торкунови еиқәшаҳаҭхеит иналукааша ашәҟәыҩҩы Фазиль Искандер ибиуст ари аҵараиурҭа аҵакыраҿы ашьақәыргыларазы.
Иԥхоу, аиҩызаратә ҟазшьа зманы имҩаԥысыз аиԥылара ахыркәшамҭаз аганқәа агәалашәаратә ҳамҭақәа еимырдеит.
Олег Барцыц иара убасгьы МГИМО аректортә зал аҿы МГИМО иҭоу аԥснытәи астудентцәа дырԥылеит.
Олег Барцыц астудентцәа ирзеиҭеиҳәеит Адәныҟатәи аусқәа рминистрра аусура ахырхарҭа хадақәа ртәы, дрылацәажәеит адәныҟатәи аполитикаҿы Аԥсны Аҳәынҭқарра актуалра злоу ахыдҵақәеи Аахыҵ Кавказ арегион аҿы агеополитикатә ҭагылазаашьеи, рҭак ҟаиҵеит хыԥхьаӡара рацәала изыӡырҩцәа рызҵаарақәа.
