Ԥхынгәы 1 азы Аԥсны Адәныҟатәи аусқәа рминистр инапынҵақәа назыгӡо, аминистр ихаҭыԥуаҩ Иракли Ҭыжәба Аԥсны иҟоу Урыстәылатәи Афедерациа аҷыдалкаатә зинмчы змоу ацҳаражәҳәаҩ Виачеслав Гладков иҟынтәи агәраргагатә шәҟәқәа рыхкьыԥхьаақәа идикылеит.

Иракли Ҭыжәба Виачеслав Гладков имаҵураҭыԥ ҿыц идиныҳәалеит, ԥхьаҟатәи иусураҿы ақәҿиарақәа изеиӷьеишьеит.

"Аԥсны ахә ҳаракны иршьоит ҳтәылақәеи ҳажәларқәеи рыбжьара ишьақәгылаз аиҩызаратәи аиашьаратәи еизыҟазаашьақәа рыҩаӡара. Ҳтәылақәа реизыҟазаашьа аҳәынҭқаррабжьаратә усеицураҿ иреиҳаӡоу аҩаӡараҿы иҟоуп, астратегиатә еидгыла аҟазшьа аныԥшуеит», ҳәа азгәеиҭеит иара.

Иара убасгьы инаҵшьны иазгәеиҭеит Урыстәылатәи Афедерациа ацхыраареи адгылареи ирыбзоураны ишалыршахо Аԥсны Аҳәынҭқарра ашәарҭадареи аҭышәынтәалареи реиқәыршәара азҵаарақәа қәҿиарала рыӡбара, асоциал-економикатә проектқәа рынагӡара, аҵарадырра, агәабзиарахьчара, акультура, ақыҭанхамҩа, атуризм русхк аҟны аусеицура арҿиара.

"Анорматив-зинтә база аҽарҭбаауеит, аҽарӷәӷәоит. Иҳаҩсыз ашықәсқәа рзы ҳтәылақәа рыбжьара еиуеиԥшым аусхкқәа рҿы 250 инареиҳаны аиқәшаҳаҭрақәа анапы рыҵаҩын. Урҭ ҳәынҭқаррабжьаратә еиқәшаҳаҭрақәоуп, иара убас аиҳабырақәеи, аминистррақәеи, аусбарҭақәеи, Урыстәылатәи Афедерациа арегионқәеи рыҩаӡарала анапы зҵаҩу еиқәшаҳаҭрақәоуп», ҳәа азгәеиҭеит иара.

Иракли Ҭыжәба агәрагара ааирԥшит Виачеслав Гладков иԥышәа беиа ҩ-ганктәи аусеицура аринахысгьы арӷәӷәара ишацхраауаз.

"Урыстәылатәи Афедерациаҟны амаҵура дуқәа рҿы административтә, анапхгараҭаратә усура аԥышәа ду шшәымоу ҳасаб азуны, уи иабзоураны ҳҿаԥхьа иқәгылоу ауснагӡатәқәа зегьы оперативла рыӡбара шҳалшо агәра ганы ҳаҟоуп. Уи ҩ - ганктәи ҳаизыҟазаашьақәа иҵегьы аимпульс рнаҭоит», - ҳәа азгәеиҭеит Иракли Ҭыжәба.

Виачеслав Гладков иакәзар Иракли Ҭыжәба иҭабуп ҳәа иеиҳәеит гәыблыла дахьидикылаз азы.

"Сара сзы, жәаҳәарада, ҳаҭыр дууп Аԥсны Аҳәынҭқаррахь аара. Урыстәылатәи Афедерациа ахада Ацҳаражәҳәарҭа сахагыларц инапынҵа сымоуп. Сара слахьынҵа иҭабуп ҳәа ахысҳәаауеит абри аҩыза аҳаҭыр азы. Сгәыӷуеит ҳусеицура ҳаиашьаратә жәларқәа ирзеиӷьхап ҳәа. Ҳаԥхьаҟа ишьҭоу, ҳажәларқәа ззыԥшу, аиааироуп", ҳәа инаҵшьны иазгәеиҭеит иара.

Агәраргагатә шәҟәқәа рыхкьыԥхьаақәа рыҭара ашьҭахь ҩ-ганктәи амшхәаԥштә актуалтә зҵаарақәа рзы агәаанагарақәа реимдара мҩаԥысит.