Лаҵарамза 22 рзы Ҭырқәтәылатәи Ареспубликаҿы иҟоу Аԥсны Аҳәынҭқарра азинмчы змоу Ахаҭарнакраҿы Ҭырқәтәыла иҟоу Аԥсны азинмчы змоу ахаҭарнак Ибрагим Аҩӡбеи 1992-1993 шықәсқәа раантәи Аԥсны Аџьынџьтәылатәи еибашьраҿы иҭахаз аибашьцәа ранацәеи Аԥснытәи аделегациа аилазаара иалахәны Ҭырқәтәыла иаҭааны иҟоу аҳәса-аветеранцәеи реиԥылара мҩаԥысит. Аиԥылара рхы аладырхәит аделегациа алахәылацәа: Ааԥсадгьыл ахь архынҳәразы Аԥсны Аҳәынҭқарратә еилакы ахантәаҩы ихаҭыԥуаа Бастаҟәа Агрбеи Асҭамыр Багаҭелиеи, арепатриациазы Афонд адиректор ихаҭыԥуаҩ Ҭенгиз Анқәаб, азеиԥш ҟәша аспециалист хада Ирина Лашәриаԥҳа, Жәлар Реизара-Апарламент адепутат Нарсоу Салаҟаиа.
Аиԥылараан, Аԥсны Аџьынџьтәылатә еибашьраҿы иҭахаз аибашьцәа ранацәа рахь ихы нарханы, Ибрагим Аҩӡба инаҵшьны иазгәеиҭеит зыԥсадгьыл ахақәиҭра зхы ақәызҵаз афырхацәаҵәҟьа шырааӡаз.
Азинмчы змоу ахаҭарнак иазгәеиҭеит Аԥсны ахақәиҭреи ахьыԥшымреи рзы ақәԥараҿы ахацәа рыжәҩахыр рымаданы еибашьуаз, атыли агоспитальқәеи рҿы аус зуаз аҳәса рлагала наунагӡа ҳтәыла иҿыцӡоу аҭоурых хьтәы нбанла ишанҵоу.
