Боливариантәи Ареспублика Венесуела иҟоу анапынҵа ҷыдақәеи азинмчнагӡеи змоу Аԥсны Аҳәынҭқарра ацҳаражәҳәаҩ Заур Ӷәаџьаа, Венесуела иҟоу Урыстәылатәи Афедерациа анапынҵа ҷыдақәеи азинмчнагӡеи змоу ацҳаражәҳәаҩ Сергеи Мелик-Багдасаров иҟаиҵаз ааԥхьарала, Каракас ақалақь аҿы имҩаԥысуаз ацәыргақәҵа “Имилаҭрацәоу Урыстәыла” аартра ихы алаирхәит.
Урыстәыла абҵарамза ԥшьба рзы иазгәарҭо амилаҭтә акзаара Амш инамаданы еиҿкаахо ацәыргақәҵа атәыла иуникалу аетнокультуратә ҭынха иазкын.
Урыстәылатәи Афедерациа ацҳаражәҳәаҩ Сергеи Мелик-Багдасаров адныҳәаларатә ажәахә ҟаиҵеит.
Урыстәыла Ацҳаражәҳәарҭеи Россотрудничество Ахаҭарнакреи рыцхыраарала еиҿкааз ацәыргақәҵа аартра рхы аладырхәит Венесуела аминистррақәеи аусбарҭақәеи рхаҭарнакцәеи егьырҭ асасцәеи.
