Жәабран 20 азы, Боливариантәи Ареспублика Венесуела иҟоу Аԥсны Аҳәынҭқарра аҷыдалкаатә зинмчы змоу Заур Ӷәаџьаа, Венесуела иҟоу Урыстәылатәи Афедерациа аҷыдалкаатәи азинмчнагӡеи змоу ацҳаражәҳәаҩ Сергеи Мелик-Багдасарови Урыстәыла Ацҳаражәҳәарҭа арратә атташе, аполковник Сергеи Надежкини рнаԥхьарала Аԥсадгьыл ахьчаҩ Имш иазкыз адкылара далахәын.
Урыстәыла ацҳаражәҳәаҩ Сергеи Мелик-Багдасаров адкылараҿы ажәахә ҟаиҵеит. Аусмҩаԥгатә аҳәаақәа ирҭагӡаны, ацҳаражәҳәаҩ Заур Ӷәаџьаа Урыстәыла ацҳаражәҳәаҩи Ацҳаражәҳәарҭа аусзуҩцәеи зегьы есышықәса, жәабран 23 азы иазгәарҭо агәалашәаратә рыцхә рыдиныҳәалеит.
Аусмҩаԥгатә иалахәын Венесуела аккредитациа змоу адипломатиатә миссиақәа рхаҭарнакцәеи, Венесуела Адәныҟатәи аусқәа рминистрра ахаҭарнакцәеи егьырҭ асасцәеи.
