Женева ихыркәшахеит Кавказнҭыҵ ашәарҭадареи аҭышәынәалареи рзы Жәларбжьаратәи Женеватәи аиҿцәажәарақәа 62-тәи рраунд. ЕАР, ОБСЕ, ЕХ рыцхантәаҩрала имҩаԥысыз аиҿцәажәарақәа рхы рыладырхәит Аԥсны, Аахыҵ Уаԥстәыла, Қырҭәыла, Урыстәыла, Еиду Америка Аштатқәа. Аԥснытәи аганахьала аиԥылара иалахәын: Аԥсны адәныҟатәи аусқәа рминистр ихаҭыԥуаҩ Одиссеи Бигәаа, Женеватәи аиҿцәажәарақәа рлахәылацәа, Аԥсны АдәАР ахаҭарнакцәа Лаша Аҩӡба, Артур Гагәылиа.
Аиԥылара алахәылацәа иазԥхьагәаҭаз амшхәаԥштә зҵаарақәа пунк-цыԥхьаӡа ирзааҭгылеит. Еиуеиԥшм атемақәа шьҭыхын. Ахәҭакахьала, актәи агәыԥ аҿы иалацәажәон аҳәаа иаԥну араионқәа рҿы аҭагылазаашьа. Аахыҵ Кавказ ашәарҭадареи аҭышәынтәалареи рзы Женеватәи аиҿцәажәарақәа 62-тәи рраунд аҟны иалацәажәан иара убас амч ахамырхәаразы адокумент аицеиқәшаҳаҭра азкылгара аус адулара азҵаара. Аԥсны ахаҭарнакцәа ақырҭуа ган иадыргалеит ҿырҳәалатәи аицҳәамҭа авариант ҿыц, аха ақырҭуа ган аҽазныкгьы мап ацәнакит аԥсуа ган ажәалагала.
Ҩаԥхьа, ақырҭуа ган ахымҩаԥгашьа иалнамыршеит абри азҵаараҿы гәаанагарак азеицнеира. Аԥсни Қырҭтәылеи, Аахыҵ Уаԥстәылеи Қырҭтәылеи рҳәааҟны аҭагылазаашьа аилатәара алахәылацәа зегьы, ақырҭуа ган ада, иҭышәынтәалоу ҳәа ахәшьара арҭеит. Ахәшьара бзиа аҭан аԥсынтәи амчрақәа иаԥырҵаз агуманитартә коридор. Убри аан аиԥылара алахәылацәа зегьы еицҿакны иазгәарҭеит ԥхьаҟазы ашьаҿақәа реицеихгара ада ԥсыхәа шыҟам. Аԥсны, Аахыҵ Уаԥстәыла, Урыстәыла еиҭахгьы инаҵшьны ирҳәеит Қырҭтәыла амч ахамырхәаразы аиқәшаҳаҭра анапаҵаҩреи Гал аидысларақәа рызхьаԥшреи раԥырҟәҟәаареи рзы амеханизм (МПРИ) арҿыцреи шаҭаху. Аганқәа ргәаанагарақәа еибырҳәеит.
Аиԥылара аҳәаақәа ирҭагӡаны имҩаԥысит аԥснытәи агани Урыстәылатәи Афедерациа, Еиду аштатқәеи, Европатәи ахеидкылеи рҟнытәи аиҿцәажәарақәа рлахәылацәеи реиԥыларақәа. Урыстәыла, Аԥсны, Аахыҵ Уаԥстәыла рделегациақәа Женеватәи аиҿцәажәарақәа ирымоу аформат ааныжьны даҽа тәылак ахь риагараз ацхантәаҩцәа рахь ажәалагала ҟарҵеит. Ари ажәалагала мзызс иаиуит Швеицариа анеитралтә позициа аанкылара иахьаҟәыҵыз.
Аҟәа ажәалагала ҟанаҵеит аԥсуа тәылауаҩшәҟәы змоу атәылауаа егьырҭ аҳәынҭқаррақәа рахь рцаразы ироуа ауадаҩрақәа рыӡбаразы жәларбжьаратәи аусутә гәыԥ аԥҵазарц. Иааиуа араунд аҿы аҟазауаҩ далархәны аинформациатә сессиа амҩаԥгареи иарбоу аҵак ду змоу азҵаара аӡбаразы аусуратә гәыԥ аԥҵареи азыԥхьагәаҭоуп.
Жәларбжьаратә аиҿцәажәарақәа анаҩстәи 63-тәи рраунд амҩаԥгара азыԥхьагәаҭоуп 2025 шықәса хәажәкырамза актәи азыбжазы.