31 шықәса раԥхьа, 1994 шықәса абҵара 26 рзы Аԥсны Аҳәынҭқарра Иреиҳаӡоу Ахеилак аилатәараҿы ирыдыркылеит Аҳәынҭқарра Азакәан Хада.

Аҳәынҭқарратә ҟазшьеи асуверенитети рырӷәӷәараҿы ароль ду назыгӡо Аԥсны Аҳәынҭқарра Аконституциа 1999 шықәса жьҭаара 3 рзы зеиԥшбжьыҭирала азыразра азыҟаҵан. Ари аҭоурыхтә шьаҿа ҳаамҭазтәи Аԥсны аҳәынҭқарра арӷәӷәараҿы ишьаҿа дуун.

Адокумент аҿы Аԥсны Аҳәынҭқарра асуверентә, адемократиатә, азинтә ҳәынҭқарра акәны ишыҟоу, ҭоурыхла ажәлар ахалахатәҳәаақәҵара азин шрымоу шьақәнарӷәӷәеит.

Аконституциа ирыланаҳәеит аҳәынҭқарра азакәанԥҵаратә, анагӡаратә, аӡбарҭатә усхкқәа реиҟәыҭхара; ауаҩы изинқәеи ихақәиҭрақәеи хәдықәҵас рзыҟалара.

31 шықәса ҵуеит Азакәан хада шьаҭас иҟаҵаны, Аԥсны Аҳәынҭқарра, егьырҭ аҳәынҭқаррақәеи иареи реизыҟазаашьақәа рырҿиареи жәларбжьаратәи аимадарақәа рырҭбаареи иаҿужьҭеи.