Аԥсны Адәныҟатәи аусқәа рминистр Олег Барцыц Урыстәылатәи Афедерациа Адәныҟатәи аусқәа рминистр Сергеи Лавров Аџьынџьтәылатәи Еибашьра Дуӡӡаҿы Аиааира агара Амш идиныҳәалеит.
Адныҳәалараҿы иазгәаҭоуп:
"Лаҵарамза жәба — харҭәаашьа змам ахәԥса ахҭынҵаны асовет жәлар анемец нацизм аиааирала аҩажәатәи ашәышықәса ашәарҭара дуӡӡа иацәганы, ауаатәыҩса анеиқәдырхазтәи мшуп. Аԥсны Аҳәынҭқарреи Урыстәылатәи Афедерациеи уи аибашьра хлымӡаах иалагылаз, афашизм еилаԥыххаа иқәызҵаз, адунеи агәыӷра аззырхынҳәыз рабдуцәа иузырҟәымҭхо ргәадура рыцеиҩыршоит. Урҭ ргәымшәареи, хырбгалашьа змам рхачҳареи, рыԥсадгьыл абзиабареи абар ԥшьынҩажәа шықәса инареиҳаны анаҩстәи абиԥарақәа рзы уаҩышәаратә мҩақәҵагас иҟоуп. Рфырхаҵара ишьҭанаҵаз ауасхыртә принципқәеи адоуҳатә мазара дуқәеи иахьагьы гәымшәарыла зыԥсадгьыл атәымтәылатәи ампыҵахалаҩцәа ирцәызыхьчо урыстәылатәи асолдаҭцәа рдоуҳа напхгара арҭоит.
1945 шықәсазы еилаԥыххааз аидеологиа уажәы ҩаԥхьа ахы шьҭнахуеит, аҭоурыхтә иашеи, ашәарҭадареи, ҳзеиԥш ԥеиԥши ашәарҭара иҭанаргылоит. Урыстәылатәи Афедерациа иахьа ари ақәԥара ҿыц имҩаԥнагар акәхеит — аиашаразы, ажәларқәа аҭоурыхтә гәалашәареи асуверентә ԥсҭазаареи роураз рзин азы. Аԥсны Аҳәынҭқарра ари аиҿагылараҿы астратегиатә партниор иааигәара игылоуп, ипозициагьы ицеиҩыршоит".
Олег Барцыц Сергеи Лаврови Урыстәылатәи Афедерациа адәныҟатәи аусқәа Рминистрра аколлектив зегьи ирзеиӷьеишьеит агәабзиара, агәамч, аҭынчреи аиашареи рус амаҵзураҿы ақәҿиарақәа.