Мшаԥы 24 рзы Аԥсны Адәныҟатәи аусқәа Рминистрраҟны имҩаԥысит Адәныҟатәи аусқәа рминистр Олег Барцыци РОО "Ростовтәи Аԥсуа диаспора" ахантәаҩы Виктор Ҳашбеи реиԥылара.

Аиԥылараан, ахәҭакахьала, агуманитартә, акультуратә, аспорттә ҟазшьа змоу азҵаарақәа ирылацәажәеит.

Адәныҟатәи аусқәа рминистр инарҭбааны адырра иҭан РОО "Ростовтәи Аԥсуа диаспора" 2026 шықәсазтәи агәҭакқәа рзы. Иара иакәзар иҳәеит ацхыраара аҭара дшазыхиоу.

Олег Барцыц ҷыдала инаҵшьны иазгәеиҭеит адунеи ахьынӡанаӡааӡо инхо ҳџьынџьуааи ҳареи ҳаимадара арӷәӷәара аҵак ду шамоу, иара убас – аҿар рыдгылареи аус рыдулареи.