Аԥсны Адәныҟатәи аусқәа рминистр Олег Барцыц Москва иусуратә ҭаара аҳәаақәа ирҭагӡаны имҩаԥысит Адәныҟатәи аусқәа рминистри апартиа «Иаку Урыстәыла» аҟынтәи Урыстәылатәи Афедерациа Аҳәынҭқарратә Дума адепутат, жәларбжьаратәи аусқәа рзы Аҳәынҭқарратә Дума аилак алахәыла, жәлар рдипломатиа Ацентр адиректор хада Дмитри Савельеви реиԥылара. Аиԥылара иара убас лхы алалырхәит Аԥсны иҟоу ЖәРА афилиал акоординатор Валериа Мановицкаиа.
Аганқәа Адәныҟатәи аусқәа рминистрреи жәлар рдипломатиа Ацентри реинырра алшарақәа ирылацәажәеит. Ахәҭакахьала, аиԥылараҿы иалацәажәан аиԥыларақәа рырҭбаара, Аԥсны Аҳәынҭқарра агуманитартәи, акультуратәи, аекономикатәи усхкқәа рҿы ЖәРА аусура ахьымҩаԥнаго атәылақәеи иареи реинырра арцыхцыхра.
Аконструктивтә ҟазшьа зманы имҩаԥысыз аиԥылара аҳәаақәа ирҭагӡаны, жәлар рдипломатиа Ацентри Адәныҟатәи аусқәа рминистрреи жәларбжьаратәи аренаҿы Аԥсны аҭыԥ азыԥшаара аиӷьтәра алзыршо апроектқәа рыцхырааразы аиқәшаҳаҭра рыбжьарҵеит. Урҭ Аԥсны адырра аизырҳара иацхраауеит, иара убас уи иҵоуроу ахаҿсахьа аҳәаанырцәтәи атәылақәа рҿы аӡыргара иацхраауеит.