Адипломатиатә еицәажәара

Адипломатцәа рнапынҵақәа рынагӡаразы  аҵак ду аманы иҟоуп иахьыҟоу атәыла ахаҭарнакцәа, адипломатиатә корпус ала рколлегацәа рацәажәара.

Аилкаара  «адипломатиатә еицәажәара» – акыр инарҭбаау еилкаароуп. Иара иаҵанакуеит ҩаӡарала, ҵакыла, формала еиуеиԥшымкәа аиныррақәа рымҩаԥгара. Еицәажәо  руаажәларратә ҭагылазаашьа, рзинмчрақәа, излацәажәо  азҵаарақәа, реицәажәара амаҭәар – арҭ зегьы ҵакыла аицәажәарақәа аԥыжәара рырҭоит.

Ҳахәаԥшып аилкаара  - «адипломатиатә еицәажәара» азинмч нагӡеи иҷыдоу анапынҵақәеи змоу ацҳаражәҳәаҩи/аофициалтә хаҭарнаки иахьыҟоу атәылақәа рофициалтә хаҿқәеи реинырра аҿырԥшала.

Ацҳаражәҳәаҩ дызҭаауа ахаҿы иахь днеиаанӡа еиликаар ахәҭоуп дахьыҟоу атәыла аофициалтә хаҭарнакцәа аҳәынҭқаррақәа рыбжьара аполитикатә, аекономикатә, акультуратә уҳәа егьырҭ  аимадарақәа рыхә шыршьо. Заанаҵтәи аиқәшаҳаҭрақәа ззалыршоу аицәажәарақәа  иалдыршоит иазыԥхьагәаҭоу асценари  иацәхьаҵыр, заанаҵы аиҭакрақәа рызхәыцра. Аха аҭыԥ роур алшоит машәыршәатәи аицәажәарақәагьы, иаҳҳәап адкыларақәа раан. Урҭ еиҳарактәи рхықәкы адыррақәа реизгареи аинформациа аҭареи роуп.

Иԥшӡам ҳәа иазыԥхьаӡоуп аицәажәараан асааҭ ахәаԥшра. Ари аицәажәара  хыркәшатәуп ҳәа идырраҟаҵаганы ишьоуп.

Аицәажәараан  абжьы ҭымгакәа,  гәамҵрак аҭыԥ амазаргьы ицәырымгакәа ахымҩаԥгара аҭахуп. Аха убри аан аҳаҭырқәҵареи апатуқәҵареи адипломат иԥырхагамхароуп излацәажәо апроблема иреиҵаӡоу азҵаарақәагьы рывсраз.

Апозициа агәра угартә иҟалоит  афактқәа рыла иҵаҵӷәыркызар. Убри аан хымԥада дара рхыҵхырҭа официалтә хыҵхырҭазароуп.

Аиҿцәажәара аихшьаалақәа рыла ишьақәдыргылоит  амшынҵатә ҩыра. Адипломатиатә практикаҟны ишьақәгыланы иҟоуп ари аҩыза аҩыра аформа ҷыда. Изыҿцәажәо ижәла, имаҵзура, идипломатиатә чын, аиҿцәажәара анымҩаԥысуаз амш, асааҭ, аҭыԥ, заҟаамҭа ицоз, заԥшьгамҭала ихацыркыз зегь арбатәуп. Иҳәатәуп  аиҿцәажәара ахԥатәи ахаҿқәа алахәызу иалахәымзу.