Аԥсны адәныҟатәи аусқәа рминистрра Германиа аофициалтә хаҭарнак Хьыбла Амҷԥҳа есышықәса Берлин имҩаԥысуа Евразиатәи аилазаара иеиҿнакаауа Қьырсаныҳәатә хәылԥазы далахәын.

Евразиатәи аилазаара аамҭа-аамҭала имҩаԥнагоит атематикатә хәылԥазқәа еицырдыруа аполитикцәа, Бундестаг адепутатцәа, ажурналистцәа, Германиа еицырдыруа аҭҵаарадырреи акультуреи русзуҩцәа алархәны.

«Аилазаара ахантәаҩы Александр Рара, еицырдыруа аполитолог, ашәҟәыҩҩы, аҭоурыхдырыҩ ҭабуп ҳәа иасҳәоит анаԥхьара ахьсиҭаз азы. Ахәылԥаз аҟны сықәгылараан иааркьаҿны салацәажәеит Аԥсни Германиеи реимадара. Аԥсны Адәныҟатәи аусқәа рминистрра ахьӡала ҳреспублика иаҭаарц ааԥхьара рысҭеит. Агәыӷра аасырԥшит ԥхьаҟагьы акрызҵазкуа ҳаизыҟазаашьақәа шҳарҿио азы» ҳәа азеиҭалҳәеит АдәАР Амедиацентр Хьыбла Амҷԥҳа.